ޕީޕީއެމް/ޕީއެންސީގެ ވެރިކަމެއްގައި، ފުލުހުންނާއި ސިފައިންނަކީ ދިވެހިރާއްޖޭގެ ފަޚުރު ކަމުގައި އެބޭފުޅުންނަށް އިހްސާސް ވާނެ ކަމަށް އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

"ދިވެހިންގެ ރާއްޖެ" ބިސްބުރު ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަ ދައްކަވަމުން ޑރ. މުޢިއްޒު ވިދާޅުވީ، ދިވެހި ސިފައިންނާއި ފުލުހުންނަކީ ދިވެހިންގެ ފަޚުރު ކަމަށެވެ. އަދި އަބުރުވެރި ދިރިއުޅުމެއް އުޅުމުގެ ފުރުސަތު އެންމެ ބޮޑަށް ދޭންޖެހޭ އެއްބަޔަކީވެސް ދިވެހި ސިފައިންނާއި ފުލުހުން ކަމަށް އެމަނިކުފާނު ވިދާޅުވި އެވެ. 

އެހެންނަމަވެސް މިސަރުކާރުން ދިވެހި ފުލުހުންނާއި ސިފައިންނާއި ދޭތެރޭގައި އަމަލު ކުރަމުންދަނީ ވަރަށް އިހާނަތިކޮށް ކަމަށް މުޢިއްޒު ވިދާޅުވިއެެވެ. އަދި ސަރުކާރުން ސިފައިންނާއި މެދު އިހްމާލުވަމުންދަނީ ގަސްތުގައި ކަމަށްވެސް އެމަނިކުފާނު ވިދާޅުވިއެވެ. 

އެގޮތުން، ހިދުމަތްތެރިންނަށް ލިބެންޖެހޭ އެލަވަންސްތައް ކުޑަކޮށް ގެދޮރުވެރިކަމުގައިވެސް ކަންކުރަނީ އެހާ ދެރަވަރުކޮށް ކަމަށް މުއިއްޒު ވިދާޅުވިއެވެ.

"އެއްވެސް ވަރަކަށް އިހުސާސެއް ނުވޭ ތިމަންނާ މެނަކީ ގައުމުގައި މުހިންމު ބައެކޭ މިސަރުކާރުން ކަންތައްކުރާގޮތުން." މުއިއްޒު ވިދާޅުވިއެވެ.

އެހެންކަމުން، އެމަނިކުފާނަށް ވެރިކަން ލިބިވަޑައިގެންފިނަމަ، ދިވެހިރައްޔިތުންނަށް ކުރިއަށް ގެންދާ ގެދޮރުވެރިކަމުގެ މަޝްރޫއުގެ ތެރެއިން، ސިފައިންނާއި ފުލުހުންނަށް ވަކިން ހާއްސަ ގެދޮރުވެރިކަމުގެ މަޝްރޫއުތައް ހިންގަވާނެ ކަމަށް މުޢިއްޒު ވިދާޅުވިއެެވެ. 

މީގެ އިތުރުން ވެސް ސިފައިންނާ ފުލުހުންނަށް ދޭ އެލަވަންސް ބޮޑު ކޮށްދީ, އެ މީހުންނަކީ ފުދުންތެރި ބަޔަކަށް ހަދައިދެއްވާނެ ކަމަށްވެސް މުޢިއްޒު ވިދާޅުވިއެވެ. 

މިއާއެކު ޑރ މުއިއްޒު ވިދާޅުވީ ދިވެހި ސިފައިންނާއި ފުލުހުންނަކީ މި ގައުމުގެ ފަހުރުކަން އިހުސާސްވާ ގޮތަށް އެ ބޭފުޅުންނަށް މަސައްކަތް ކުރުމުގެ ފުރިހަމަ އިހުތިޔާރާއި ބާރު ދެއްވާނެ ކަމަށްވެސް މުޢިއްޒު ވިދާޅުވިއެވެ.