ޔޫރޯ ކޮލިފައިންގައި ހުކުރު ދުވަހުގެ ރޭ ރަށުން ބޭރުގައި ޖޯޖިޔާ އާއި ދެކޮޅަށް ކުޅުނު މެޗުން ފަސޭހަކަމާއެކު މޮޅުވެ، ގުރޫޕްގެ ދެވަނަ މަގާމަށް ސްޕެއިނުން ކުރިއަށް ޖެހިލައިފިއެވެ. މިމެޗު ސްޕެއިނުން ކާމިޔާބުކުރީ 7-1 ގެ ތަފާތުބޮޑު ނަތީޖާއަކުންނެވެ.

މެޗުގެ ފުރަތަަމަ ހާފުގައި ސްޕެއިންގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، މިމެޗުގައި އެޓީމުން ކާމިޔާބުކުރި ފުރަތަމަ ލަނޑު މެޗުގެ 22 ވަނަ މިނެޓުގައި ކާމިޔާބުކޮށްދިނީ ކެޕްޓަން އަލްވާރޯ މޮރާޓާ އެވެ. މިއީ އެޓީމުގެ ޕީއެސްޖީ ފޯވާޑް މާކޯސް އަސެންސިއޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ފަސް މިނެޓު ފަހުން އެޓީމުން ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލުކޮށްފައެވެ. މިލަނޑަކީ ޖޯޖިޔާގެ ޑިފެންޑަރު ސޮލޮމަން ކްވިރްކްވެލިއާ އަތުން ބައިކޮޅަށް ވަން ލަނޑެކެވެ.

މިހާފުގައި ސްޕެއިނުން ކާމިޔާބުކުރި ތިންވަނަ ލަނޑު 38 ވަނަ މިނެޓުގައި ޑެނީ އޮލްމޯ ކާމިޔާބުކޮށްދިންއިރު، އޭގެ ދެމިނެޓު ފަހުން އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ކެޕްޓަން އަލްވާރޯ މޮރާޓާ އެވެ. މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

Advertisement

ދެވަނަ ހާފުގެ ފެށިގެން ހަތަރުވަނަ މިނެޓުގައި ޖޯޖިޔާ އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ޖިއޯޖީ ޗަކްވެޓަޑްޒޭ އެވެ.

ނަމަވެސް ދެވަަނަ ހާފުގައި ސްޕެއިނުން ވަނީ އިތުރު ތިން ލަނޑު ކާމިޔާބުކޮށްފައެވެ. އެގޮތުން އެޓީމުގެ ކެޕްޓަން މޮރާޓާ ވަނީ މިހާފުގައި އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި އެޓީމުގެ ފަސްވަނަ ލަނޑު އެތްލެޓިކް ބިލްބާއޯ ފޯވާޑް ނިކޯ ވިލިއަމްސް ކާމިޔާބުކޮށްދިންއިރު، އެޓީމުގެ ފަހު ލަނޑު ފަހުހާފުގެ 74 ވަނަ މިނެޓުގައި ކާމިޔާބުކޮށްދިނީ ބާސެލޯނާގެ ޒުވާން ފޯވާޑް ލަމައިން ޔަމާލް އެވެ.

މިލަނޑާއެކު އުމުރުން 16 އަހަރުގެ ޔަމާލް ވެގެންގޮސްފައިވަނީ ސްޕެއިންގެ ގައުމީ ޓީމަށް ކުޅުނު އަދި ލަނޑުޖެހި އެންމެ ހަނގު ކުޅުންތެރިޔާއަށެވެ. މިއާއެކު މެޗުގެ ކުޅުން ނިމިގެންދިޔައީ 7-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ސްޕެއިންއަށް ހަ ޕޮއިންޓް ލިބިފައިވާއިރު، އެޓީމު މިވަގުތު އޮތީ ގްރޫޕް އޭގެ ދެވަނައިގައެވެ. އަދި މިމެޗުން ބަލިވި ޖޯޖިޔާއަށް ހަތަރު މެޗުން ހަތަރު ޕޮއިންޓް ލިބިފައިވާއިރު އެޓީމު މިވަގުތު އޮތީ ގްރޫޕް ހަތަރުވަނައިގައެވެ.