މިއަދު ކުރިއަށްމިދާ ރިޔާސީ އިންތިޚާބު 2023ގެ ވޯޓުލުން ނިމެންދެން ކަންކަން ވަމުން ދާގޮތް އޮބްޒާވް ކުރަމުން ދާނެ ކަމަށް ހިޔުމަން ރައިޓްސް ކޮމިޝަނުން ބުނެފިއެވެ.
އެކޮމިޝަނުން ބުނީ ރިޔާސީ އިންތިޚާބުގެ ވޯޓުލުން މިހާރު ފެށިފައިވާ ކަމަށާއި، ޤައުމުގެ ހިންގުމުގައި ބަސްބުނަން ލިބޭ މި ފުރުޞަތުގެ ބޭނުން ހިފައި މި އިންތިޚާބުގައި ވޯޓުލުމުގެ ޙައްޤު ލިބިފައިވާ އެންމެހައި ރައްޔިތުން ނިކުމެ ވޯޓު ލުމުގައި ބައިވެރިވުން މުހިއްމުކަމަށެވެ.
މީގެ އިތުރުން އެޗްއާރްސީއެމުން ބުނީ ރިޔާސީ އިންތިޚާބުގެ އޮބްޒާވް ކުރުމަށް އެޗްއާރްސީއެމްގެ އޮބްޒާވަރުން އަންނަނީ ހަރަކާތް ތެރިވަމުން ކަމަށެވެ.
" އިންތިޚާބު ނިމި ވަގުތީ ނަތީޖާ އިއުލާންކުރުމާ ހަމަޔަށްވެސް ކޮމިޝަނުގެ އޮބްޒާވަރުން ވޯޓުލާ މަރުކަޒުތަކުގައި ހަރަކާތްތެރިވާނެ" އެޗްއާރްސީއެމުން ބުނެފައިވެއެވެ.
އިންތިޚާބުގައި ވޯޓު ލުމުގެ ހައްޤު 18 އަހަރު ފުރިފައިވާ ކޮންމެ ދިވެއްސަކަށް ލިބިފައިވާ ކަމަށާއި، 18 އަހަރުފުރިފައިވާ އެންމެހާ ފަރާތްތަކުން ވޯޓުގައި ބައިވެރިވުން މުހިންމު ކަމަށްވެސް އެކޮމިޝަނުން ބުނެފައިވެއެވެ.
ހަމަމިއާއި އެކު އާންމުން ވޯޓުލުމަށް ކިއުގައި ތިބޭ ތިބުމުގައިވެސް އާންމު މަސްލަހަތު ގެއްލޭފަދަ ކަމެއް ނުކުރުމަށާއި، ވޯޓުލާ މަރުކަޒާއި، ސަރަހައްދުގައި ކެމްޕެއިން ކުރުންފަދަ ވޯޓުލާ ދުވަހު ކުރުން މަނާ ކަންތައްތައް ނުކުރުމަށް ގޮވާލާ ކަމަށްވެސް އެކޮމިޝަނުން ބުނެފައިވެއެވެ.
އަދި އިންތިޚާބާއި ގުޅިގެން އެއްވެސް ޝަކުވާއެއް ވާނަމަ ލަސްނުކޮށް ޝަކުވާ ހުށައެޅުމަށްވެސް އެކޮމިޝަނުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
