ޔޫރޯ ކޮލިފައިންގައި ހޮނިހިރު ދުވަހުގެ ރޭ އަމިއްލަ ދަނޑުގައި ފަހުވަގުތު ކާމިޔާބުކުރި ލަނޑާއެކު ނޯތު މެސެޑޯނިއާ އިން އިޓަލީ މޮޅުވިޔަނުދީ ހިފަހައްޓައިފި އެވެ. 

މިމެޗު 1-1 ގެ ނަތީޖާއަކުން އެއްވަރުވި އިރު، މިދިޔައަހަރު ވޯލްޑްކަޕް ކޮލިފައިންގައި ނޯތު މެސެޑޯނިއާ އިން ވަނީ 1-0 ގެ ނަތީޖާއަކުން އިޓަލީ ބަލިކޮށް ވޯލްޑްކަޕްގެ ޕްލޭއޮފް ބުރުން ޖާގަ ހޯދާފައެވެ.

މިމެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ އިޓަލީ އިން މެޗު ޑޮމިނޭޓުކުރި އިރު، މިއީ އިޓަލީގެ ކޯޗުކަމާއި ލޫސިއާނޯ ސްޕަލެޓީ ހަވާލުވިފަހުން އެޓީމު ކުޅުނު ފުރަތަމަ މެޗެވެ. 

މިފާހުގައި އިޓަލީގެ މިޑްފީލްޑަރު ބްރަޔަން ކްރިސްޓަންޓޭ އަށް ލަނޑުޖަހާނެ ރަގަޅު ހުސް ދެ ފުރުސަތު ލިބި ބޭނުން ނުކުރެވުނުއިރު، އެޓީމުގެ ސަންދުރޯ ޓޮނަލީ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން ދެވަނަ މިނެޓުގައި އިޓަލީ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ސިރޯ އިމޮބެލް އެވެ. މިއީ އެޓީމުގެ މިޑްފިލްޑަރު ނިކޮލޯ ބަރޭލާ ފޮނުވާލި ބޯޅަ ގޯލުގެ ހުރަސް ދަނޑީގައިޖެހިފައި ނުކުތް ވަގުތު ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ނޯތު މެސެޑޯނިއާ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 81 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު އެނިސް ބަރްދީ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިމެޗުން ލިބުނު އެއް ޕޮއިންޓާއެކު ކުޅުނު ހަތަރު މެޗުން ނޯތު މެސެޑޯނިއާ އަށް ހަތަރު ޕޮއިންޓް ލިބިފައިވާއިރު، ތިން މެޗު ކުޅެގެން އިޓަލީ އަށް ވެސް ލިބިފައިވަނީ ހަތަރު ޕޮއިންޓެވެ. ލަނޑުގެ ތަފާތުން ގްރޫޕް ސީގެ ތިން ވަނަ އިޓަލީއަށް ލިބޭއިރު، ނޯތު މެސެޑޯނިއާ މިވަގުތު އޮތީ ފަސް ޓީމު ހިމެނޭ މިގުރޫޕްގެ ހަތަރުވަނައިގައެވެ.