ހޮނިހިރު ދުވަހު މޮރޮކޯއަށް އައި 6.8 މެގްނެޓިޔުޓްގެ ބިންހެލުމުގައި މަރުވި މީހުންގެ ޢަދަދު 2000 މައްޗަށް އަރައިގެން ހިނގައްޖެއެވެ.

އަލްޖަޒީރާ ގައި ބުނެފައިވަނީ މޮރޮކޯގެ ފަރުބަދަމަތީ އަވަށަށް އައި ބިންހެލުމާއި ގުޅިގެން ރެސްކިޔު ވޯކަރުން ދަނީ ވެއްޓި ހަލާކުވެފައިވާ ޢިމާރާތް ތަކުގެ ދަށުން މީހުން ހޯދައި މީހުން ސަލާމަތްކުރެވޭތޯ މަސައްކަތް ކުރަމުން ކަމަށެވެ. އަދި ކަމާއި ބެހޭ އިދާރާތަކުން އަންނަނީ މަރުވި މީހުން ދެނެގަތުމުގެ މަސައްކަތް ތައް ކުރަމުން ކަމަށެވެ.

މި ހާދިސާގައި 2000 އަށް ވުރެ ގިނާ މީހުން މަރުވެފައިވާއިރު 2000 އަށްވުރެ ގިނަ މީހުނަށް ވަނީ އެކިވަރުގެ އަނިޔާތައް ވެސް ލިބިފައެވެ.

Advertisement

މޮރޮކޯގެ ރަސްގެފާނު މުޙައްމަދު 6ވަނަ އެޤައުމުގެ ސިފައިންނަށް އަންގައިފައިވަނީ ބިންހެލުން އައިސް ހަލާކުވި ސަރަހައްދުން މީހުން ހޯދުމަށާއި މީހުން ސަލާމަތްކުރުމަށް ޚާއްސަ ޓީމުތައް އެކުލަވައިލުމަށާއި ބިންހެލުން އައި ސަރަހައްދުގައި އެކަށީގެންވާ ފަރުވާ ދެވޭނެ ޚާއްސަ ސަރޖިކަލް މެޑިކަލް ކޭމްޕުތަކެއް ޖެހުމަށެވެ.

ބިންހެލުން އައިސްފައިވަނީ މޮރޮކޯގެ ފަރުބަދަ މަތީ އަވަށެވެ. ހޮނިހިރު ވިލޭރޭގެ ދަންވަރު އައި ބިންހެމުގެ ސަބަބުބް ފަރުބަދަމަތީ އަވައްތަކުގެ ދުވަސްވީ ޢިމާރާތްތައް ވަނީ ހަލާކުވެ ވެރިފައެވެ.

ބިންހެލުން އައި ސަރަހައްދުގައި އޮންނަ ތަފެގައްޓް އަވަށުގައި ބިންހެލުމަށް ފަހު ކޮއްޅަށް ހަމައެންމެ އިމާރާތެއްވެސް ނެތް ކަމަށް އަލްޖަޒީރާގައި ބުނެފައިވެއެވެ. ބިންހެލުމުގެ ސަބަބުން އެއަވަށުގައި ހުރި ޢިމާރާތް ތަކަކީ މަށިން ހަދައިފައި ހުރި ޢިމާރާތްތަކެއް ކަމަށްވެސް ބުނެފައިވެއެވެ.

"އަހަރެންގެ ކާފަ ދަރިންނާއި އެކުދިންގެ މަންމަ މަރުވެއްޖެ، އަދިވެސް އެމީހުންވީ ވެއްޓުނު އިމާރާތުގެ ދަށުގައި، މީގެ ވަގުތު ކޮޅެއް ކުރިން އަހަރެމެން އެކުގައި ހީ ކުޅެ ސަމާސާކޮށް ހެދިން" 72 އަހަރުގެ ޢުމަރް ބެންހަމަން ބުނެފައިވެއެވެ. ޢުމަރުއަކީ ތަފެގައްޓް އަވަށުގެ މީހެކެވެ.

މި ބިންހެލުމަކީ މޮރޮކޯގެ ތާރީޚުގައި އައި އެންމެ ބާރުގަދަ ބިންހެލުން ކަމަށް އަލްޖަޒީރާގައި ބުނެފައިވެއެވެ. މޮރޮކޯގެ ސަރުކާރުން މިހާރުވަނީ ހިތާމަ ފާޅު ކުރުމުގެ ތިން ދުވަހުގެ ގޮތުގައި ބިންހެލުން އައި ދުވަހާއި ވިދިގެން އައި ތިން ދުވަސް ހަމަޖައްސައިފައެވެ.