ރައީސް އިބްރާހިމް މުހައްމަދު ޞާލިހްގެ ވެރިކަމުގައި ފާއިތުވި ފަސްއަހަރަށްވުރެ ބޮޑަށް ހަރުކަށި ފިކުރު ތަންފީޒުކުރާނެ ސަރުކާރެއް ނާންނާނެކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ނަޝީދު މިފަދައިން ވިދާޅުވީ، ރިޔާސީ އިންތިހާބުގެ ފުރަތަމަ ބުރުގެ ވޯޓަށްފަހު މިއަދު ކުރި ޓުވީޓެއްގައެވެ. 

ނަޝީދުގެ ޓުވީޓުގައި ބުނެފައިވަނީ މި ފަސްއަހަރަށްވުރެ ހަރުކަށި ފިކުރު ތަންފީޒުކުރާނެ ސަރުކާރެއް އަތުވެދާނެ ކަމުގެ ބިރުވެރިކަން އޮތް ކަނަށް ދެކެން ދަތި ކަމުގައެވެ. 

ރިޔާސީ އިންތިހާބުގެ ފުރަތަމަ ބުރުގެ ވަގުތީ ނަތީޖާ މިހާރު އިއުލާނުކޮށްފައިވާއިރު، ފުރަތަމަ ބުރުގެ ނަތިޖާއިން 45.1 އިންސައްތައިން ކުރިހޯދައިފައިވަނީ، ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒެވެ. ނަތީޖާ ދައްކާގޮތުން ދެވަނައިގައި އުޅެނީ 38.2 އިންސައްތަ ވޯޓުން އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ޞާލިހެވެ. 

ރިޔާސީ އިންތިހާބުގެ ދެވަނަ ބުރު މި މަހުގެ 30 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން އިއުލާނުކޮށްފައިވާއިރު، މިހާރު އުފެދިފައިވާ ބޮޑު ސުވާލަކީ އިންތިހާބުގެ ދެވަނަ ބުރުގައި ފުރަތަމަ ބުރުން ނާކާމިޔާބުވި ކެންޑިޑޭޓު ދެވަނަ ބުރުގައި ކޯލިޝަން ހަދާނީ ކޮން ކެނޑިޑޭޓަކަށް ކަމުގައެވެ.