ރިޔާސީ އިންތިޚާބުގެ ނަތީޖާއަކީ ހައިރާންވާފަދަ ނަތީޖާއެއް ކަމަށާއި، ހެދުނު ގޯސްތައް ރަނގަޅުކޮށް ދެވަނަ ބުރު ކާމިޔާބު ވެދާނެ ކަމަށް މި ސަރުކާރުގެ ޔޫތް މިނިސްޓަރ އަޙްމަދު މަޙްލޫފް ވިދާޅުވެއްޖެއެވެ.

މަޙްލޫފް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

މަޙްލޫފް ވިދާޅުވީ މިޙަޤީޤަތް ޤަބޫލުކޮށް އަދި ހަޖަމުކޮށްގެން، ހެދިފައިހުރި ގޯސްތައް ރަނގަޅުކޮށްގެން ދެވަނަ ބުރުގައި ރައީސް ޞާލިޙަށް މި އިންތިޚާބު ކާމިޔާބުވެދާނެ ކަމަށެވެ.

2008 ވަނަ އަހަރުގެ ފުރަތަމަ ބުރުގައި ރައީސް މައުމޫން 45% ހޯއްދެވިއިރު ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި 25% ހޯއްދެވި ރައީސް މުޙައްމަދު ނަޝީދު ކަމަށް މަޙްލޫފް ވިދާޅުވެފައެވެ. މީގެއިތުރުން މަޙްލޫފް ވިދާޅުވީ 2013ގެ އިންތިޚާބުގައި ފުރަތަމަ ބުރުގައި ރައީސް ނަޝީދު 47% ހޯއްދަވާފައިވަނިކޮށް ފަހަތުން އަރާ ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި 25% ހޯއްދެވީ ރައީސް ޔާމީން ޢަބްދުލް ޤައްޔޫމް ކަމަށެވެ.

ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވުމަށް ހަމަޖެހިފައިވަނީ މި ސެޕްޓެމްބަރ މަހުގެ 30 ވަނަ ދުވަހުއެވެ.