ޔޫރޯ 2024 ގެ ކޮލިފައިންގައި އާދިއްތަދުވަހުގެ ރޭ އަމިއްލަ އަމިއްލަ ސަޕޯޓަރުންގެ ކުރިމަތީގައި ވަރުގަދަ ޕޮލެންޑް ބަލިކޮށް އަލްބޭނިއާ އިން ގުރޫޕް އީގެ އެއްވަނައިގައި ހަމަޖެހިލައިފި އެވެ.

މިދެޓީމު އެންމެ ފަހުން ވާދަކުރި 9 މެޗުން ވެސް ޕޮލެންޑް މޮޅުވެފައިވާއިރު، މިއީ އަލްބޭނިއާގެ ތާރީޚްގައި ޕޮލެންޑުގެ މައްޗަށް އެޓީމުން ކުރި ހޯދި ފުރަތަމަ ފަހަރެވެ.

މެޗުގެ ފުރަތަަމަ 11 މިނެޓުގެ ތެރޭގައި ޕޮލެންޑުން އަލްބޭނިއާގެ ގޯލާއި އަމާޒުކޮށް ނުރައްކާތެރި ދެ ހަމަލާއެއް ފޮނުވާލި އިރު، ފުރަތަމަ ހާފުގެ 21 ވަނަ މިނެޓުގައި އެޓީމުން ލަނޑެއް ވެސް ކާމިޔާބުކުރި އެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

Advertisement

މިމެޗުގައި އަލްބޭނިއާ އިން ކާމިޔާބުކުރި ފުރަތަމަ ލަނޑު މެޗުގެ 37 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ޖާސިރު އަސާނީ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލްބޭނިއާ ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ ޕޮލެންޑުން ނެވެ. އަދި އެޓީމުން ގާތްގާތުގައި ރަގަޅު ފުރުސަތުތަކެއް ތަނަވަސްކުރި ނަމަވެސް، ދެވަނަ ހާފުގެ 62 ވަނަ މިނެޓުގައި އަލްބޭނިއާ އިން ވަނީ އިތުރު ލަނޑެއް ކާމިޔާބުކޮށް ޕޮލެންޑް ސިއްސުވާލާފައެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ ފޯވާޑް މިރްލިންޑް ޑަކޫ އެވެ. މިއީ އެޓީމުގެ މިޑްފިލްޑަރު ރަމަޑާނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑަށްފަހު ޕޮލެންޑުން ކުރިއަށް ޖެހި މެޗުގެ ނަތީޖާ އެއްވަރު ކުރެވޭތޯ ވަރަށް މަސައްކަތް ކުރި އެވެ.

ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން އަލްބޭނިއާ ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ފަސް މެޗުން ލިބުނު 10 ޕޮއިންޓާއެކު ގްރޫޕް އީގެ އެއްވަނައިގައި މިވަގުތު އޮތީ އަލްބޭނިއާ އެވެ. އަދި މިމެޗުން ބަލިވި ޕޮލެންޑް ކުޅުނު ފަސް މެޗުން ލިބުނު ގަ ޕޮއިންޓާއެކު އެޓީމު މިވަގުތު އޮތީ ގްރޫޕްގެ ހަތަރުވަނައިގައެވެ.