ރިޔާސީ އިންތިހާބުގެ ދެވަނަ ބުރުގައި ވާދަކުރައްވާ 2 ކެންޑިޑޭޓުންގެ ކެންޑިޑޭޓު ނަންބަރަކީ ފުރުތަމަ ބުރުގައި ވާދަ ކުރެއްވި ނަންބަރުކަމަށް އިލެކަޝަންސް ކޮމިޝަންސް (އީސީ) ގެ ނައިބުރައީސް އިސްމާއިލް ހަބީބް ވިދާޅުވެއްޖެއެވެ.

އެކަން ހާމަކޮށްފައިވަނީ އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ރޭ ކުރެއްވި ޓްވީޓެއްގައެވެ. އެހެންކަމުން ދެވަނަ ބުރުގައިވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ނަންބަރަކަށް ވާނީ 3 އެވެ. އަދި ޕީޕީއެމް/ ޕީއެންސީގެ ކެންޑިޑޭޓް ޑރ މުހައްމަދު މުއިއްޒު ގެ ކެންޑިޑޭޓް ނަންބަރަކީ 4 އެވެ. 

މީގެ އިތުރުން އީސީއިން ވަނީ ފުރަތަމަ ބުރުގައި ވޯޓުލީތަން ނޫން އެހެން ތަނަކަށް ދެވަނަ ބުރުގައި ވޯޓު ލުމުގެ ފުރުސަތު ވަރަށް އަވަހަށް ހުޅުވާލާނެ ކަމަށާ، އެކަމަށްޓަކައި ދެވޭނީ އެންމެ ދެ ދުވަސް ކަމަށް ބުނެފައެވެ. 

8 ކެންޑިޑޭޓުންނާއެކު މިމަހު 9 ވަނަ ދުވަހު ބޭއްވުނު ރިޔާސީ އިންތިހާބުން ދެވަނަ ބުރަކަށް ގޮސްފައިވަނީ އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އާއި ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުއެވެ. ފުރުތަމަ ބުރުގައި ރައީސް ސާލިހްއަށް %39.02 ލިބިވަޑައިގެންފައިވާއިރު ޑރ. މުއިއްޒުވަނީ %46.16 އިން ކުރިހޯއްދަވާފައެވެ.

މިއަހަރުގެ ރިޔާސީ އިންތިޚާބުގެ ދެވަނަ ބުރުގެ ވޯޓުލުން އޮންނާނީ ސެޕްޓެންބަރު މަހުގެ 30 ގައެވެ.