މިމަހުގެ 9 ވަނަ ދުވަހު ބޭއްވި ރިޔާސީ އިންތިހާބަކީ އަމާން ކަމާއި އެކު ނިމުނު އިންތިހާބެއް ކަމަށާ، އެކަމަށްޓަކައި އިލެކްޝަންސް ކޮމިޝަނުން އަދާކުރަންޖެހޭ ޒިންމާ ފުރިހަމަ ގޮތުގައި އަދާކޮށްފައިވާ ކަމަށް އިންތިހާބު އޮބްޒާވް ކުރެއްވުމަށް ރާއްޖެ ވަޑައިގެންނެވި ބައިނަލްއަގުވާމީ އޮބްޒާބަރުން ވިދާޅުވެއްޖެއެވެ.
އިންތިހާބު އޮބްޒާވް ކުރެއްވުމަށް ރާއްޖެ ވަޑައިގެންނެވި ބައިނަލްއަގުވާމީ އޮބްޒާބަރުންގެ ފަރާތުން މިއަދު ބެއްވުނު ނޫސްވެރިންގެ ބައްދަލުވުމުގައި ސައުތު އެފްރިކާ ގެ ފަރާތުން ވަޑައިގެން ހުންނެވި އޮބްޒާވަރު ވިދާޅުވީ، އިންތިހާބު ގެ ކަންކަން ދިޔަގޮތާއިމެދު ވަރަށް ހިތްހަމަޖެހިވަޑައިގަންނަވާ ކަމަށެވެ. އެގޮތުން އޭނާ ވަނީ އިންތިހާބުގައި ބައިވެރިވި ވޯޓް ފޮށި ހުންނަ މަރުކަޒުތަކުގައި ހަރާކާތްތެރިވި %95 މީހުންނަކީ އަންހެނުން ކަމަށާއި އެކަން އެގޮތައް އޮތުމަކީ ވަރަށް ބޮޑު ކާމިޔާބީއެއް ކަމަށް ވިދާޅުވެފައެވެ.
އަދި، އޭނާ ބަލަމުންދިޔަ ސަރަހައްދު ތަކުގައި ކިޔޫއެއްވެސް ނެތް ކަމަށާ، ވޯޓު ލުމަށް ގިނަ މީހުން ނެގީ އެންމެ މިނެޓެއް ވަރު ކަމަށާ، އެހެން އެކަން ވީ ވޯޓު ލުމަށް ސްކޫލުތަކުގެ ހޯލްތައް ބޭނުން ކުރުމުން ކަމަށާ، އޭގެ ސަބަބުން ވޯޓްލާ މަރުކަޒުތަކުގައި ތޮއްޖެހުން ކުޑަ ވެގެން ދިޔަ ކަން އޭނާ ފާހަގަކުރެއްވިއެވެ.
މީގެ އިތުރުން އޭނާ އެންމެ ހައިރާންވި ކަމެއްގެ ގޮތުގައި ފާހަގަ ކުރެއްވީ، ނުކުޅެދުންތެރިކަން ހުންނަ މީހުން ނުވަތަ އެހީއަށް ބޭނުންވާ މީހުންނަށް އިސްކަންދިން މަންޒަރު ފެނުމުން ކަމަށް އޭނާ ވިދާޅުވި އެވެ.
މިއަދުގެ ބައްދަލުވުމުގައި، އޮބްޒާވަރުންގެ ތެރޭގައި ހިމެނޭ ކުރީގެ ކޮމިޝަނާ އޮފް އިލެކްޝަންސް އަދި ކުރީގެ ސްރީލަންކާގެ ޗެއާމަން އޮފް އިލެކްޝަންސް ކޮމިޝަނާ މޮހިންދުއްދޭ ސަޕްރިޔާ ވިދާޅުވީ މި އިންތިހާބަކީ އަމާން އިންތިޚާބެއް ކަމަށެވެ.
މި އިންތިހާބަކީ، އަމާން، ހަމަނުޖެހުމާއި އަނިޔާވެރިކަން ނުހިނގާ، އިންސާފުވެރި އިންތިހާބެއް. އެއީ އެންމެ މުހިންމު ކަންކަން. އެންމެ ބުނޭ އިލެކްޝަންސް ކޮމިޝަންގެ ޒިންމާ އަކީ ވޯޓާސް ރެޖިސްޓާ ތައްޔާރުކޮށް، އިންތިހާބު ބޭއްވުން ކަމަށް. އެހެން ނަމަވެސް އިލެކްޝަންސް ކޮމިޝަންގެ ޒިންމާއަކީ ގައުމުގެ ސިޔާދަތު ރައްކާތެރިކޮށް، ރައްޔިތުންނަށް ވޯޓުލުމުގެ ހައްގު ކަށަވަރުކޮށްދީ، ޑިމޮކްރެޓިކް ނިޒާމް ދެމެހެއްޓުން. ދިވެހިރާއްޖޭގެ އިލެކްޝަންސް ކޮމިޝަނުން އެ ޒިންމާ ފުރިހަމަ އަށް އަދާކޮށްދީފި.
ބައިނަލް އަގުވާމީ އޮބްޒާވަރުން
އިންތިހާބުގެ ކާމިޔާބީ އަށްޓަކައި އިލެކްޝަންސް ކޮމިޝަންގެ އެންމެހާ ފަރާތްތަކަށް ޝުކުރު އަދާކުރަން ޖެހޭ ކަމަށާ، އަދި ރައްޔިތުން ދެއްވި އެއްބާރުލުމަށް ރައްޔިތުންނަށް ވެސް ޝުކުރު އަދާކުރަން ޖެހޭ ކަމަށް އޮބްޒާވަރުން ވަނީ ބުނެފަ އެވެ.
މިއިންތިޚާބުގެ ކަންކަމުގެ ތެރެއިން ރަނގަޅު ކުރަންޖެހޭ ކަންކަން ފާހަގަކޮށް އޮބްޒާވަރުން ވިދާޅުވީ، ވޯޓް ލާ މަރުކަޒުތަކުގައި ހުންނަ ސެކިއުރިޓީންނަށް އެއްވެސް ކަހަލަ ހަތިޔާރެއް ދީފައި ނުވުމާއި، ރިޔާސީ އިންތިހާބުގައި ރާއްޖެއަށް ކުރިމަތިވި އެންމެ ބޮޑު އުނދަގުލަކީ ރާއްޖޭގެ ރިޔާސީ އިންތިހާބުގައި ބައިވެރިވި މީހުން މަދުވުން ކަމަށެވެ. އެހެންކަމުން ކުރިޔަށް އޮތް އިންތިހާބުތަކުގައި މިކަންތައް ރަނގަޅު ކުރުމަށް އެބޭފުޅުން އިލްތިމާސް ކުރެއްވިއެވެ.
Advertisement
This content is created and paid for by advertisers and does not involve Voice Journalists
