ރިޔާސީ އިންތިހާބުގެ ދެވަނަ ބުރަށް ދިޔަ ދެ ޕާޓީގެ ކަމުގައިވާ ވެރިކަން ކުރާ އެމްޑީޕީ އާއި އިދިކޮޅު ޕީޕީއެމް/ޕީއެންސީގެ ފަރާތުންވެސް އެކުގައި ކޯލިޝަން ހެދުމަށް ދަޢުވަތު އައިސްފައިވާ ކަމަށް އިންތިޚާބުގައި އަމިއްލަ ގޮތުން ވާދަކުރެއްވި ފާރިސް މައުމޫން ވިދާޅުވެއްޖެއެވެ. 

ރިޔާސީ އިންތިހާބުގެ ފުރަތަމަ ބުރުގައި ބައިވެރި 8 ކެންޑިޑޭޓުންގެ ތެރެއިން ފަސް ވަނައަށް އެންމެ ގިނަ ވޯޓު ހޯއްދެވީ ފާރިސް އެވެ. އެއީ 2979 ވޯޓެވެ. 

އިންތިޚާބަށްފަހު ފާރިސް މިއަދު ކުރެއްވި ޓްވީޓެއްގައި ވިދާޅުވީ، ރައީސް ޞާލިހު އާއި ޑރ. މުޢިއްޒު އާއި ދެބޭފުޅުންގެ ފަރާތުން ވެސް ދެވަނަ ބުރުގައި އެކުގައި މަސައްކަތް ކުރުމަށް ދައުވަތު އަރުއްވާފައިވާ ކަމަށެވެ. 

Advertisement

އަދި ދެފަރާތާއި އެކު ކުރިއަށް ގެންދާ މަޝްވަރާ ބައްދަލުވުންތަކުގައި އޭނާގެ ފަރާތުން އޭނާގެ މެނިފެސްޓޯ ގައި ހިމެނުއްވި ކަންކަން ހުށަހަޅުއްވާނެ ހުށަހަޅުއްވާނެ ކަމަށްވެސް ވިދާޅުވެފައިވެއެވެ. 

މިއާއެކު ފާރިސް ވިދާޅުވީ އަދި މިހާތަނަށް ވަކި ބައެއްގެ ފަހަތަށް އަރާވަޑައިގެންނެވުމަށް ނިންމަވާފައި ނުވާ ކަމަށާއި، ދާދި އަވަހަށް އޭނާ އެކަން އާންމުކޮށް އިއުލާނުކުރައްވާނެ ކަމަށެވެ. 

ރިޔާސީ އިންތިހާބުގެ އެންމެ ފޯރިގަދަ ދުވަސްތައް ކުރިއަށް އޮތް އިރު އިންތިހާބު ދެވަނަ ބުރުގައި 3 ފަރާތަކުން ކޯލިޝަން ހަދާނެކަމުގެ އިޝާރާތެއް ކޮށްފައިވާކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހް ވަނީ ވިދާޅުވެފައެވެ. އަދި މީގެ އިތުރުންވެސް އިންތިހާބުގެ ދެވަނަ ބުރުގައި އެކުގައި މަސައްކަތް ކުރުމަށް ހުރިހާ ސިޔާސީ ޕާޓީތަކަށް ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވަނީ ރޭ އެ ޕާޓީން ބޭއްވީ ޖަލްސާގައި ދައުވަތު އަރުވައިފައެވެ.