އަވަށްޓެރި އިންޑިއާ އިން ދިވެހިރާއްޖޭގެ ދާޚިލީ ކަންކަމަށް އަތްބާނާތީ, ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި އެ މައްސަލަ ޔޫއެން އަށްވެސް ހުށަހެޅުއްވި ކަމަށް، ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ. 

އިންޑިއާއިން ރާއްޖޭގެ ދާޚިލީ ކަންކަމަށް އަތް ބާނައި ރާއްޖެއަށް ބިރުދައްކާތީ އެކަން އދ.ގެ ސަމާލުކަމަށް ގެންނެވުމަށް ރައީސް ޔާމީނުގެ ސަރުކާރުގައި އދ އަށް ފޮނުއްވި ސިޓީއެއް ހިއްސާކޮށް ނޫސްވެރިއެއް ކޮށްފައިވާ ޓުވީޓެއް ރިޓުވީޓް ކުރައްވަމުން އާޒިމާވެސް ވަނީ އެކަން ތެދު ކުރައްވައި، އެކަމަށް އޭނާ އެކަން ޔަގީން ކޮށްދެއްވާ ކަމަށް ވިދާޅުވެފައެވެ. 

ރައީސް ޔާމީންގެ ސަރުކާރުގައި ފޮރިން މިނިސްޓްރީން އދ. އަށް ފޮނުވި އެ ސިޓީގައި ވަނީ، އިންޑިއާ އިން ދިވެހިރާއްޖެއާއި މެދު ކަންކަން ކުރަމުން އަންނަނީ އދ. އާއި ބައިނަލް އަގުވާމީ ގޮތުން ހެދިފައިވާ ގާނޫނު ތަކާއިވެސް ޚިލާފަށް ކަން ފާހަގަކޮށްފައެވެ. 

އެގޮތުން އިންޑިއާގެ ބޮޑުވަޒީރާއި އެ ގައުމުގެ ސަރުކާރުން ދިވެހިރާއްޖޭގެ ދާޚިލީ ކަންކަމަށް އަތްބޭނުމުގެ ގޮތުން ރާއްޖޭގައި ޑިމޮކްރެސީ ގެ ނިޒާމް ހިންގަންޖެހޭނެ ގޮތާއި، ރާއްޖޭގެ ޝަރުޢީ ދާއިރާގެ ކަންކަންވެސް ކުރަންޖެހޭނެ ގޮތާއި މެދު ގޮތް ބުނަމުންދާ ކަމަށް އެ ސިޓީގައި ބުނެފައިވެއެވެ. 

މީގެ އިތުރުން ވެސް އިންޑިއާގެ ސިފައިންގެ ހަރަކާތްތައް ރާއްޖޭގައި ހިންގުމަށް އެއްބާރުލުންދީ އެކަމަށް ހިތްވަރު ދިނުމަށް އެ ގައުމުގެ މީޑިއާތައް މެދުވެރިކޮށްވެސް މަސައްކަތް ކުރަމުން އަންނަ ކަމަށާ، އޭގެ ސަބަބުން ދިވެހިންގެ މެދުގައި ބިރުވެރިކަން އުފެދެމުންދާ ކަމަށް އެސިޓީގައި ހާމަކޮށްފައިވެއެވެ.

ހަމަ އެހެންމެ ރައީސް ޔާމީން ގެ ވެރިކަން ވައްޓާލުމަށް އިންޑިއާ ސިފައިން ރާއްޖެއަށް ފޮނުވުމަށް ހިތްވަރުދީވެސް އެގައުމުގެ މީޑިއާ ތަކުގައި ޚަބަރު ފަތުރާފައިވާ ކަމަށާ، އެކަން ކަން އިންޑިއާ ސަރުކާރުގެ ސަމާލުކަމަށް ގެނައުމުންވެސް އެ ސަރުކާރުން އެއްވެސް ޖަވާބެއް ލިބިފައި ނުވާ ކަމަށް އެ ސިޓީގައި ވެއެވެ.