މިހާރު ދިވެހި ރާއްޖެއަކީ މުސްތަޤިއްލު ޤައުމެއްތޯ ސުވާލު އުފެދޭ ކަމަށް ޝައިޚް ޝަފީޢު ޢަބްދުالله ވިދާޅުވެއްޖެއެވެ.

ޝައިޚް ޝަފީޢު މިހެން ވިދާޅުވެފައިވަނީ ޝައިޚް ކުރައްވައިފައިވާ ޓްވީޓެއްގައެވެ.

ޝަފީޢު ވިދާޅުވެފައިވަނީ ދިވެހިރާއްޖެއާއި އެކު ޒަމާންވީ ވަރަށް ގާތް ޚާރިޖީ ގުޅުން ދަމަހައްޓަމުންދާ އެތަކެއް ޤައުމެއްގެ އެމްބަސީތަކާއި އެމްބަސިޑަރުން މާލޭގައި އެބަ ތިއްބެވި ކަމަށެވެ. އެހަނަސް އެއް ޤައުމު ފިޔަވާ އެހެން އެއްވެސް ޤައުމެއްގެ އެމްބަސީން ދިވެހިރާއްޖޭގެ ދާޚިލީކަންކަމުގެ ތެރެޔަކަށް ދުވަހަކު ވެސް މި ގޮތަށް ވަދެފައި ނުވާކަމަށްވެސް ބުނެފައިވެއެވެ.

" މިހާރު ދިވެހިރާއްޖެއަކީ މިނިވަން މުސްތަޤިއްލު ދައުލަތެއްތޯއޭ ވެސް ސުވާލު އުފެދޭ ހިސާބަށް ކަންކަން ވަނީ ގޮސްފައި"  ޝައިޚް ޝަފީޢު ވިދާޅުވެފައިވެއެވެ.

ޝެއިޚް ވިދާޅުވީ މިއީ ދިވެހީން ބަލައިގަންނާން ޖެހޭ ކަންކަމެއް ނޫން ކަމަށާއި މިއީ ދިވެހީން ނޫނެކޭ ބުނާން ޖެހޭ ކަންކަމަށެވެ. މިހާރު މި އޮތް ސަރުކާރާއި ސިޔާސީ ލީޑަރުންނަށް މި ކަން ވިސްނޭންވެއްޖެކަމަށް ޝައިޚް ޝަފީޢު ވިދާޅުވިއެވެ.

މީގެ އިތުރަށް ޝައިޚް ވިދާޅުވެފައިވަނީ އިންތިޚާބުގެ ފުރަތަމަ ބުރުގެ ނަތީޖާއިން ދައްކަނީ ދިވެހީންނަކީ އެއްވެސް ޤައުމެއްގެ އަޅުވެތިކަމަށް ދާން ބޭނުންވާ ބައެއް ނޫން ކަން ކަމަށާއި، ދިވެހީންނަކީ މިނިވަންކަމަށް ލޯބިކުރާ، ޤައުމު ދެކެ ލޯބިވާ، ޤައުމުގެ ކަރާމަތާއި ޢިއްޒަތަށް ނުހަނު އިޙްތިރާމުކުރާ ބައެއް ކަމެއް ކަމަށް ޝައިޚް ޝަފީޢު ވިދާޅުވިއެވެ.

ޝަފީޢު މިހެން ވިދާޅުވެފައިވަނީ ސަރުކާރުގެ އިސްވެރިން ތަކެއް އިންޑިޔާގެ ސަފީރާއި ބައްދަލުކުރެއްވި ކަމަށް އަޑުފެތުރެމުން ދަނިކޮށެވެ.