ޔޫރޯ 2024 ގެ ކޮލިފައިންގ ގްރޫޕް ޖޭގައި މިރޭ ތަފާތުބޮޑު ނަތީޖާއަކުން ލަކްޒެމްބަރގް ބަލިކޮށް ގުރޫޕްގެ އެއްވަނައިގައި ފަސް ޕޮއިންޓްގެ ލީޑެއް ނަގައިފިއެވެ.

އެންމެ ފަހު ކުޅުނު މެޗުގައި ދެއްކި ރީނދޫ ކާޑާއެކު މިރޭގެ މެޗަށް ސަސްޕެންޑްވެފައިވާ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ނުލައި އެޓީމުން ކުޅުނު މިމެޗުގެ ފުރަތަަމަ ހާފުގައި ޕޯޗުގަލް އިން ވަނީ ހަތަރު ލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު ޑިފެންޑަރު ގޮންކާލޯ އިނާސިއޯ ކާމިޔާބުކުރި އިރު، ދެވަނަ ލަނޑާއި ތިންވަނަ ލަނޑު ކާމިޔާބުކޮށްދިނީ ޒުވާން ފޯވާޑް ގޮންކާލޯ ރާމޯސް އެވެ. އަދި ފުރަތަމަ ހާފުގެ ނިމުމުގެ ކުރިން އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން އިނާސިއޯ އެވެ.

މެޗުގެ ދެވަަނަ ހާފުގައި ޕޯޗުގަލް އިން އިތުރު ފަސް ލަނޑު ކާމިޔާބުކުރިއިރު މި ހާފުގައި އެޓީމުގެ ލިވަޕޫލް ފޯވާޑް ޑިއެގޯ ޖޯޓާ ދެލަނޑު ކާމިޔާބު ކުރި އިރު، މިޑްފިލްޑަރު ބުރޫނޯ ފެނާންޑޭޒް، ފޯވާޑް ޖޮއާއު ފެލިކްސް އަދި ފޯވާޑް ރިކާޑޯ ހޯޓާ މިއިން ކޮންމެ ކުޅުންތެރިއަކު ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނު ބްރޫނޯ ފެނާންޑޭޒް ވަނީ ލަނޑުޖެހުމުގެ އިތުރުން އިތުރު ތިން ލަނޑު ޖެހުމަށް އެހީތެރިވެދީފައެވެ.

Advertisement

މިމެޗުން ލިބުނު ތިން ޕޮއިންޓާއެކު ކުޅުނު ހަ މެޗުން މޮޅުވެ ގްރޫޕްގެ އެއްވަނައިގައި މިވަގުތު އޮތީ ޕޯޗުގަލް އެވެ. އަދި މިމެޗުން ބަލިވި ލަކްޒެމްބަރގް ހަ މެޗުން ލިބުނު 10 ޕޮއިންޓާއެކު މިވަގުތު އޮތީ ގްރޫޕްގެ ތިންވަނައިގައެވެ.

މިއީ ޕޯޗުގަލްގެ ކޯޗުކަމާއި ރޮބާޓޯ މާޓިނޭޒް ހަވާލުވިފަހުން އެޓީމު ޖެހިޖެހިގެން މޮޅުވި 6 ވަނަ މެޗެވެ. އަދި މި 6 މެޗުގައި އެޓީމު ކޮޅަށް ލަނޑެއް ވަދެފައި ނުވާއިރު އެޓީމުން ވަނީ 24 ލަނޑު ކާމިޔާބުކޮށްފައެވެ.

މީގެއިތުރުން މިއީ މިދެޓީމު މިހާތަނަށް ކުޅުނު 18 މެޗުގެ ތެރެއިިން ޕޯޗުގަލް މޮޅުވި އެންމެ ތަފާތުބޮޑު ނަތީއްޖާއެވެ. އަދި މި 18 މެޗުން ވެސް ޕޯޗުގަލް މޮޅުވިއިރު އެޓީމުން ވަނީ މިރޭގެ މެޗުގައި ކާމިޔާބުކުރި 9 ލަނޑާއެކު ލަކްޒެމްބަރގް ކޮޅަށް 73 ލަނޑު ޖަހާފައެވެ.