އިޓަލީގެ ތަޖުރިބާކާރު މިޑްފީލްޑަރު މާކޯ ވެރާޓީ 11 އަހަރަށް ފަހު ފްރާންސްގެ ޕީއެސްޖީ ދޫކޮށް ގަތަރުގެ އަލް އަރަބީއާ އަށް ބަދަލުވެއްޖެ އެވެ. މީޑިއާ ރިޕޯޓްތައް ބުނާގޮތުގައި އުމުރުން 30 އަހަރުގެ މިޑްފީލްޑަރު އަލް އަރަބީއާ ގުޅިފައިވަނީ 45 މިލިއަން ޔޫރޯގެ ޓްރާންސްފާ ފީއެއްގައެވެ.

2012 ވަނަ އަހަރު، ފަސް އަހަރު ދުވަހުގެ އެއްބަސްވުމެއްގެ ދަށުން ޕީއެސްޖީ އާއި ގުޅުނު މިޑްފިލްޑަރު ވަނީ ފާއިތުވެދިޔަ 11 އަހަރު ދުވަހުގެ ތެރޭގައި އެކުލަބަށް 416 މެޗު ކުޅެ 11 ލަނޑު ކާމިޔާބުކޮށްދީފައެވެ. މީގެއިތުރުން އޭނާ ވަނީ އެކުލަބާއެކު ލީގު ޗެމްޕިއަންކަން 9 ފަހަރު، ފްރެންޗް ސުޕަކަޕް 9 ފަހަރު، ކޫޕް ޑި ފްރާންސް 6 ފަހަރު އަދި ކޫޕް ޑި ލާ ލީގު 6 ފަހަރު ކާމިޔާބުކުރުމުގެ އިތުރުން 2020 ވަނަ އަހަރު ޔުއެފާ ޗެމްޕިއަންސްލީގުގެ ފައިނަލުން އެޓީމަށް ޖާގަ ހޯދައިދިނުމުގައި މުހިންމު ދައުރެއް އަދާކޮށްދީފައެވެ.

މީގެއިތުރުން ވެރާޓީ އަކީ ޕީއެސްޖީގެ ތާރީޚްގައި އެންމެ ކާމިޔާބު ކުޅުންތެރިއާގެ އިތުރުން ފްރާންސް ލީގު1 ގެ ތާރީޚްގައި ވެސް އެންމެ ކާމިޔާބު ކުޅުންތެރިއާއެވެ.

Advertisement

2012 ވަނަ އަހަރުން ފެށިގެން އިޓަލީގެ ގައުމީ ޓީމަށް ކުޅެމުން އަންނަ ވެރާޓީ ވަނީ މިހާތަނަށް ގައުމީ ޓީމަށް 55 މެޗު ކުޅެ ތިން ލަނޑު ކާމިޔާބުކޮށްދީފައެވެ. މީގެ އިތުރުން 2021 ވަނަ އަހަރުގެ ކުޅެވުނު “ޔޫރޯ 2020” އިޓަލީއަށް ކާމިޔާބުކޮށްދިނުމުގެ އިތުރުން 2020/21 ވަނަ އަހަރުގެ ޔުއެފާ ނެޝަނަލް ލީގުގެ ތިންވަނަ ހޯދި އިޓަލީ ޓީމުގައި ވެސް ވެރާޓީ އަކީ މުހިންމު ކުޅުންތެރިއެކެވެ.