ލިވަޕޫލްގެ ކުރީގެ ތަރި އަދި މިހާރު ޕްރެމިއާ ލީގުގެ އެސްޓަން ވިލާއަށް ކުޅެމުން އަންނަ ބްރެޒިލްގެ މިޑްފީލްޑަރު ފިލިޕޭ ކުޓީނިއޯ ލޯނު އެއްބަސްވުމެއްގެ ދަށުން ގަތަރުގެ އަލް ދުހައިލްއާއި ގުޅިއްޖެ އެވެ.

2018 ވަނަ އަހަރުގެ ޖެނުއަރީމަހު ލިވަޕޫލު ދޫކޮށް 135 މިލިއަން ޔޫރޯގެ ޓްރާންސްފާ ފީއެއްގައި ސްޕެއިންގެ ބާސެލޯނާ އަށް ބަދަލުވި ކުޓީނިއޯ އެކުލަބުގައި ހޭދަކުރި ހަތަރު އަހަރު ދުވަހުގެ ތެރޭގައި ލޯނު އެއްބަސްވުމެއްގެ ދަށުން ޖަރުމަނުގެ ބަޔާން މިއުނިކަށް ވެސް ވަނީ ކުޅެފައެވެ. މީޑިއާ ރިޕޯޓްތައް ބުނާގޮތުގައި އުމުރުން 31 އަހަރުގެ މިޑްފީލްޑަރު އަލް ދުހައިލްއާއި ގުޅިފައިވަނީ މިސީޒަނުގެ ނިޔަލަށެވެ.

ބާސެލޯނާގައި ހޭދަކުރި ހަތަރު އަހަރަށް ފަހު ކުޓީނިއޯ އެނބުރި ޕްރެމިއާ ލީގުގަށް ބަދަލުވީ 2022 ވަނަ އަހަރުގެ ޖެނުއަރީމަހު އެވެ. ލޯނު އެއްބަސްވުމެއްގެ ދަށުން އެސްޓަން ވިލާ އަށް ބަދަލުވުމަށްފަހު ޖެރާޑްގެ އިރުޝާދުގެ ދަށުން އެޓީމުގައި ހޭދަކުރި ފުރަތަމަ ހަ މަސް ދުވަހުގެ ތެރޭގައި ކުޓީނިއޯ ވަނީ އެޓީމަށް ކުޅެދިން 16 މެޗުގައި ފަސް ލަނޑު ކާމިޔާބުކޮށް އިތުރު ތިން ލަނޑު ޖެހުމަށް އެހީތެރިވެދީފައެވެ. މިއާއެކު އެސްޓަން ވިލާ އިން ވަނީ 20 މިލިއަން ޔޫރޯގެ ޓްރާންސްފާ ފީއެއްގައި ކުޓީނިއޯ އާއެކު ތިން އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.

Advertisement

ނަމަވެސް އަނިޔާއާއި ފޯމު ދަށްވުމުގެ ސަބަބުން މިދިޔަ ސީޒަނުގައި އެކުލަބަށް ކުޅުނު 20 މެޗުގެ ތެރެއިިން އެޓީމުގެ ފުރަތަމަ އެގާރައިން އޭނާއަށް ޖާގަ ލިބިފައިވަނީ އެންމެ 7 މެޗުގައެވެ.

ރިޕޯޓްތައް ބުނާގޮތުގައި ކުޓީނިއޯގެ ސޮއި ހޯދުމަށް ތުރުކީގެ ބެސިކްޓަސް އާއި ސްޕެއިންގެ ރެއާލް ބެޓިސް އިން ޝައުގުވެރިކަން ފާޅުކުރި ނަމަވެސް އޭނާ ބޭނުންވީ ގަތަރު ލީގުގެ އަލް ދުހައިލް އަށް ބަދަލުވާށެވެ. އަލް ދުހައިލްގެ ކޯޗަކީ އާޖެންޓީނާގެ ކުރީގެ ތަރި ހާނަން ކްރެސްޕޯ އެވެ.

ޔޫރަޕުގެ ޓްރާންސްފާ މާކެޓް ސެޕްޓެމްބަރު މަހުގެ އެއްވަނަ ދުވަހު ބަންދުވިއިރު، އެސްޓަން ވިލާ އިން ވަނީ ލޯން އެއްބަސްވުމެއްގެ ދަށުން ނިކޮލޯ ޒަނިއޯލޯ އާއި ކްލެމެންޓް ލެންގްލެޓް، އިތުރުން މޫސާ ޑިއާބީ އާއި ޕައު ޓޮރޭޒް އަދި ލެސްޓާ ސިޓީ އިން ހިލޭ ޓްރާންސްފާއެއްގައި ޔޫރީ ޓިއެލެމަންސްގެ ސޮއި ވެސް ހޯދާފައެވެ.