ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު ވެރިކަމަށް ވަޑައިގެންފިނަމަ ދިވެހިރާއްޖޭގައި ހަރުކަށި ފިކުރު ފަތުރާނެ ކަމަށާ، އަންހެނުންގެ ހައްގުތައް ގެއްލިގެންދާނެ ކަމަށް އަޑު ފަތުރާ ފަރާތްތަކަށް އެމަނިކުފާނުގެ އަނބިކަނބަލުން ސާޖިދާ މުހައްމަދު ރައްދު ދެއްވައިފިއެވެ. 

ޑރ. މުޢިއްޒު ރިޔާސީ އިންތިހާބުގައި ވާދަކުރައްވާކަން އިއުލާން ކުރެއްވި އިރުން ފެށިގެން ސަރުކާރު ހިންގާ މައި ޕާޓީ، އެމްޑީޕީއަށް ތާއީދު ކުރާ ފަރާތްތަކުން ބުނަމުން އަންނަ ވާހަކަ އަކީ އެމަނިކުފާނު ވެރިކަމަށް ވަޑައިގެންފި ނަމަ އަންހެނުންގެ ހައްގުތައް ގެއްލޭނެ ވާހަކަ އެވެ. އެގޮތުން އަންހެނުން ވަޒީފާ އަށް ދިޔުމާއި ޢިލްމު އުނގެނުމަށް ވެސް ހުރަސްއެޅު މި ރާއްޖޭގައި "ޠާލިބާނުން" ގެ ވެރިކަން ކުރައްވާނެ ކަމަށްވެސް ބަޔަކު އައީ ބުނަމުންނެވެ.

ޚުދު، އެމްޑީޕީ ގެ ރިޔާސީ ީރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ތަރުޖަމާނު މާރިޔާ އަހުމަދު ދީދީ ވެސް ވަނީ އެފަދަ މޭރުމުން އެތައް ދުވަހަކު ވާހަކަ ދައްކަވާފައެވެ. 

އެވާހަކަ ތަކާއި ގުޅިގެން ސާޖިދާއާ ކުރެވުނު ސުވާލަކަށް ޖަވާބު ދެއްވަމުން އޭނާ ވިދާޅުވީ، އަންހެނުންގެ ހައްގުތައް އެންމެ ބޮޑަށް ރައްކާތެރި ކޮށްދީފައިވަނީ އިސްލާމްދީނުގައި ކަމަށެވެ. 

"އެއީ މަތިން ބާއްވާލެއްވި ދީން. އެ ދީނުގައި އެންމެ ފުރިހަމަ އޮތީ. (އަންހެނުންގެ ހައްގުތައް ރައްކާތެރިކޮށް ދީފައި)." ސާޖިދާ ވިދާޅުވި އެވެ. 

މިއާއެކު ސާޖިދާ ވިދާޅުވީ، އޭނާ ސިވިލް ސާވަންޓެއްގެ ގޮތުގައި ހެލްތު މިނިސްޓްރީގައި މަސައްކަތް ކުރައްވާތާ 23 އަހަރު ވެފައިވާ ކަމަށެވެ. އަދި ސާޖިދާ އާއި ޑރ. މުޢިއްޒު އަކީވެސް އެ ފާޑުވިދާޅުވާ ފަރާތްތަކުން "އެކްސްޓްރީމް ނޫން" ކަމަށް ބުނާ ގައުމުތަކުން މަތީ ތައުލީމް ހާސިލް ކުރައްވައިގެން ތިއްބެވި ބޭފުޅުން ކަންވެސް އޭނާ ފާހަގަކުރެއްވިއެވެ. 

މީގެ އިތުރުން، ޑރ. މުޢިއްޒު ސާޖިދާ އާއި ދަރިންގެ ކަންކަމަށް އެއްބާރުލުން ދެއްވައި އެހީތެރިވެވަޑައިގަންނަވާކަން ފާހަގަ ކުރައްވައި ސާޖިދާ ވިދާޅުވީ އޭނާ ޔޫކޭ އިން މާސްޓާރސް ވެސް ހެއްދެވީ މުޢިއްޒުގެ ޚަރަދުގައި ކަމަށާ، މުޢިއްޒު އަކީ ކުޑަ ދަރިފުޅުގެ ނެޕީ ބަދަލު ކުރުމުން ފެށިގެން ދަރިންގެވެސް ހުރިހާ ކަމެއްގައި އެއްބާރުލުން ދެއްވާ ބޭފުޅެއް ކަމަށެވެ. 

މުޢިއްޒު އާއި ސާޖިދާ-- ފޮޓޯ/ ދެން

"އަޅުގަނޑުގެ ފިރިމީހާ އަކީ އަޅުގަނޑުގެ ކޮންމެ މަސައްކަތެއްގައި އަޅުގަނޑުކުރާ ކޮންމެ ކަމެއްގައި އެއްބައިގައި ހިފަހައްޓާ ބޭފުޅެއް. ފިރިހެނަކަށް ވީތީ "ފިރިހެނެއް" ގެ ގޮތުގައި ހުންނަ ބޭފުޅެއް ނޫން. އެންމެ ކުޑަމިނުން އަޅުގަނޑުގެ ދަރިފުޅުގެ ނެޕީ ވެސް ބަދަލުކުރައްވާ ބޭފުޅެއް. އެހެންވީމާ (އެފަތުރަނީ) ކަނޑައެޅިގެން ދޮގެއް. އެއީ އަޅުގަނޑު ބޭނުން ގޮތަކަށް ކަން ކުރުމުގެ ބާރު އަޅުގަނޑަށް ދެއްވާތީ. އަޅުގަނޑު މާސްޓަރސް ހެދީ އަޅުގަނޑުގެ ފިރިމީހާގެ އެހީއާ އެކީގައި. އެބޭފުޅާ ސްޕެންޑް ކޮށްގެން ޔޫކޭ ގައި." ސާޖިދާ ވިދާޅުވި އެވެ. 

އެހެންކަމުން މުޢިއްޒު ހަރުކަށި ފިކުރު ފަތުރާނެ ކަމަށް ދެކެވޭ ވާހަކަ އަކީ ދޮގެއް ކަަމަށާ، މުޢިއްޒު "ވަރު ރަނގަޅު، ދަރިން ދެކެ ލޯބިވާ، އަނބިމީހާއަށް ތެދުވެރި، ވަފާތެރި ފިރިހެއް ނުލިބޭނެ" ކަމަށެވެ.