ރިޔާސީ އިންތިޚާބުގެ ދެވަނަ ބުރުގައިވެސް ވޯޓް ލުމަށް އޮންލައިން ކޮށް ރީރެޖިސްޓަރ ކުރެވޭނެ ކަމަށް އިލެކްޝަންސް ކޮމިޝަނުން ބުނެފިއެވެ.

އެކޮމިޝަންގެ ނައިބު ރައީސް އިސްމާއިލް ޙަބީބް ކުރައްވާފައިވާ ޓްވީޓެއްގައި ވިދާޅުވެފައިވަނީ ރިޔާސީ އިންތިހާބު 2023 ގެ ދެވަނަބުރުގެ ރީ-ރެޖިސްޓްރޭޝަން ގައި ބޭނުންކުރާނީ ފުރަތަމަ ބުރުގައި ވެސް ބޭނުންކުރި ފޯމު ކަމަށާއި، ފޯމު ފުރައިގެން އަދި އޮންލައިންކޮށްވެސް ފޯމު ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލާނެކަމަށެވެ.

  "2023 ސެޕްޓެމްބަރު 30 އަށް 18 އަހަރު ފުރޭ ޒުވާނުންނަށްވެސް ދެވަނަބުރުގައި ވޯޓުލުމުގެ ފުރުސަތު ލިބިގެންދާނެ" ޙަބީބް ވިދާޅުވެފައިވެއެވެ.

Advertisement

ޙަބީބް އިތުރަށް ވިދާޅުވީ ސެޕްޓެމްބަރ މަހުގެ 30 ވަނަ ދުވަހަށް 18 އަހަރު ފުރޭ ޒުވާނުންގެ މަޢުލޫމާތު ޑިޕާރޓްމަންޓް އޮފް ނޭޝަނަލް ރަޖިސްޓްރޭޝަނުން ހޯދުމަށް ފަހު، ވަރަށް އަވަހަށް އީސީ އިން ޢާންމު ކުރާނެ ކަމަށްވެސް ޙަބީބް ވަނީ ވިދާޅުވެފައެވެ.

ރިޔާސީ އިންތިޚާބުގެ ދެވަނަ ބުރުގެ ވޯޓްލުން ބޭއްވުމަށް ހަމަޖެހިފައިވަނީ ސެޕްޓެމްބަރ 30 ވަނަ ދުވަހުއެވެ.