ލީބިޔާގައި ފެންބޮޑުވެ ގިނަ ބަޔަކު މަރުވެ، އެއްބަޔަކު ގެއްލިއްޖެއެވެ.
ތޫފާނެއްގެ ސަބަބުން ލީބިޔާގައި ފެންބޮޑުވެފައިވާއިރު އެޤައުމުގެ ޑަރްނާ އިން ވަނީ 2000 އެއްހާ މީހުން މަރުވެފައި ކަމަށް މިލިޓަރީގެ ތަރުޖަމާނު ވިދާޅުވެއެވެ. އަދި ޑަރްނާ އިން 6000ހާއި ގާތް ކުރާ މިންވަރަށް މީހުން ގެއްލިފައިވާ ކަމަށްވެސް ބުނެފައިވެއެވެ.
މިޢަދަދު ތަކަކީ އަދި ޔަޤީން ކުރެވޭ ޢަދަދު ތަކެއް ނޫން ކަމަށާއި ލަފާ ކުރެވޭ ޢަދަދު ތަކެއް ކަމަށް އޭނާ ވަނީ ބުނެފައެވެ.
ޑަރްނާގައި ބޮދުވެފައިވާ ފެންގަނޑުގެ ތެރެއިން މީހުން ސަލާމަތް ކުރަން އުޅުނު ރެޑްކްރޮސެންޓްގެ ދެ ވޮލެންޓިޔަރަކުވެސް ވަނީ މަރުވެފައި ކަމަށް އަލްޖަޒީރާގައި ބުނެފައިވެއެވެ.
ޑަރްނާގައި މީހުންނާއި މުޢާމަލާތު ކުރުމަށް ވަނީ ދަތިތަކެއް ކުރިމަތިވެފައި ކަމަށާއި ޑަރްނާ ވަނީ ވަރަށް ބޮޑަށް ހަލާކުވެފައިވާ ކަމަށް އަލްޖަޒީރާގައި ބުނެފައިވެއެވެ.
އަލްޖަޒީރާއަށް މައުލޫމާތު ދެއްވި ލީބީޔާގެ ނޭޝަނަލް ކައުންސިލް އޮން ޔޫއެސް ލީބިޔާ ރިލޭޝަންސްގެ ރައީސް ހާނީ ޝެއްނިބް ވިދާޅުވެފައިވަނީ ޑަރްނާ އިން އެއްވެސް މައުލޫމާތެއް ނުލިބޭ ކަމަށެވެ. އެއަވަށް ވަނީ މުޅި ދުނިޔެއާއި ގުޅުން ކެނޑިފައި ކަމަށެވެ.
އިންޓަރނެޓް ކަނެކްޝަނާއި ކަރަންޓުވެސް ވަނީ ކެނޑިފައި ކަމަށާއި އެތަނަށް ޖެހިފައި އޮތް މުސީބާތުގެ މިންވަރު މިނެޓަކުން މިނެޓަކުން ބޮޑުވަމުން ކަމަށެވެ.
އޭނާ ބުނެފައިވަނީ މި ކަމުގެ އަސަރު ކުރި މީހުންގެ ޢަދަދު އަދިވެސް ދާނީ މައްޗަށް ކަމަށާއި މަރުވި މީހުންގެ ޢަދަދު 5000 ހުން މައްޗަށް އަރައިގެން ދިއުން އެކަށީގެންވާ ކަމަށެވެ.
ޑަރްނާއަކީ ބައިނައްލަޤްވާމީ ދުނިޔެ ބަލައިނުގަންނަ އިރުމަތީ ލީބިޔާގައި އުފައްދާފައިވާ އަމިއްލަ ސަރުކާރުގެ ދަށުގައި އޮންނަ ސަރަހައްދެކެވެ.
Advertisement
This content is created and paid for by advertisers and does not involve Voice Journalists
