ވޯލްޑްކަޕް ކޮލިފައިންގައި މިރޭ ރަށުން ބޭރުގައި ބޮލީވިއާ އާއި ދެކޮޅަށް ކުޅުނު މެޗު ފަސޭހަކަމާއި އެކު 3-0 ގެ ނަތީޖާއަކުން އާޖެންޓީނާ އިން ކާމިޔާބުކޮށްފި އެވެ. 

އަނިޔާގެ ސަބަބުން ކެޕްޓަން މެސީ އާއި ނުލައި ކުޅުނު އާޖެންޓީނާ އިން ވަނީ މިމެޗުގެ ފުރަތަަމަ ހާފުގައި ދެލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު ފުރަތަމަ ހާފުގެ 31 ވަނަ މިނެޓުގައި ކާމިޔާބުކޮށްދިނީ ޗެލްސީގެ މިޑްފިލްޑަރު އެންޒޯ ފެނާންޑޭޒް އެވެ. މިއީ އެޓީމުގެ މިޑްފިލްޑަރު ތަޖުރިބާކާރު މިޑްފިލްޑަރު އަންހެލް ޑިމަރިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އާޖެންޓީނާ އިން މެޗުގެ ލީޑު ހޯދިތާ 8 މިނެޓު ފަހުން ރެފްރީ ވަނީ ބޮލީވިއާގެ މިޑްފީލްޑަރު ރޮބާޓޯ ފެނާންޑޭޒް ކުރި ކުށަކާއި ގުޅިގެން އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މިމެޗުގައި އާޖެންޓީނާ އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 42 ވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު ނިކޮލަސް ޓަގްލިއާފިކޯ އެވެ. މިއީ ބޮލީވިއާގެ ޕެނަލްޓީ އޭރިއާ ބޭރުން އެޓީމަށް ލިބުނު ހިލޭ ޖެހުމެއްގައި އަންހެލް ޑިމާރިއާ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި އެއްކުޅުތެރިއަކު މަދުކޮށް ކުޅެމުންދިޔަ ބޮލިވިއާގެ ގޯލާއި އަމާޒުކޮށް އާޖެންޓީނާ އިން ގިނަ ހަމަލާތަކެއް ފޮނުވާލިއިރު، މިމެޗުގައި އެޓީމުން ކާމިޔާބުކުރި ތިންވަނަ ލަނޑު ފަހުހާފުގެ 83 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ނިކޮލަސް ގޮންޒާލޭޒް އެވެ.

މިއީ އެޓީމުގެ މިޑްފިލްޑަރު އެކްސްކުއެލް ޕެލަސިއޯސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.