މައާފަށް އެދޭނީ ހަގީގަތުގައި ވެސް އެދެން ޖެހޭ ހާލަތެއްގައި ކަމަށް ވިދާޅުވެ އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް ދަ ޑިމޮކްރެޓްސްއަށް ރައްދު ދެއްވައިފިއެވެ.
ރިޔާސީ އިންތިހާބުގެ ދެވަނަ ބުރުގައި އެމްޑީޕީއާއި އެކު ކޯލިޝަން ހެދުމަށް ދަ ޑިމޮކްރެޓްސް އާއެކު އެ ޕާޓީން މަޝްވަރާ ކުރަމުންދާއިރު، ދަ ޑިމޮކްރެޓްސް ގެ އިސްމެންބަރުން އަންނަނީ އެކަމާއިމެދު ގޮތެއް ނިންމޭނީ ފައްޔާޟް އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް ގައުމީ ޓީވީގައި ކުރީގެ ރައީސް މުހައްމަދު ނަޝީދު ގެ އަރިހުން މަޢާފަށް އެދިލެއްވުން ކަމަށް ޑިމޮކްރެޓްސް ގެ މެންބަރުން އަންނަނީ ބުނަމުންނެވެ.
އެވާހަކަ ތަކަށް ރައްދު ދެއްވައި، ރިޔާސީ އިންތިހާބުގެ ދެވަނަ ބުރަށް ކެމްޕޭން ފެއްޓެވުމަށް ރައީސް ޞާލިހު ގެ ކެމްޕޭނު ޓީމާ އެކު ދަނޑިކޮށި ޖަގަހައިގައި ރޭ ބޭއްވި ބައްދަލު ކުރެއްވުމުގައި ވާހަކަދައްކަވަމުން ފައްޔާޟް ވިދާޅުވީ، މައާފަށް އެދެންޖެހޭ ހާލަތުގައި އެކަން ކުރަން ޖެހިލުމެއް ނުވާނެ ކަމަށާއި އެކަމަކު މާތް الله ފިޔަވައި ކުޑަކަކޫ ޖަހާނެ އިތުރު ފަރާތެއް ނެތް ކަމަށެވެ.
"އަޅުގަނޑުމެން ކުޑަކަކޫ ޖަހާނީ ހަމައެކަނި الله ސުބްހާނަހޫ ވަތައާލާގެ ހަޒުރަތުގައި. އަޅުގަނޑުމެން ކުޑަކަކޫ ޖަހާނެ އެހެން އެއްވެސް ފަރާތެއް ނެތް. އަޅުގަނޑުމެން މައާފަށް އެދޭނީ، އަޅުގަނޑުމެން ހަގީގަތުގައި ވެސް މައާފަށް އެދެން ޖެހޭ ހާލަތުގައި. އަޅުގަނޑުމެން ޖެހިލުމެއް ވެސް ނުވާނެ މައާފަށް އެދޭކަށް ވެސް،"
ފައްޔާޟް އިސްމާއިލް
މިއާއެކު ފައްޔާޟް ވިދާޅުވީ މި ގައުމު އަނިޔާވެރިކަމުން ސަލާމަތް ކުރާނީ އެމްޑީޕީގައި ކުރިން އުޅުނު މީހެއް ނޫން ކަމަށާ، އެހެނެއް ކަމަކު އެކަން ކުރާނީ އެމްޑީޕީ ކަމަށެވެ.
މިއާއެކު ފައްޔާޟް ވިދާޅުވީ ފާއިތުވި ދެ ދުވަހެއްގެ ތެރޭގައި އެމްޑީޕީއަށް މަދުން ވޯޓު ލިބުނު ސަބަބު ދެނެގަތުމަށް މަސައްކަތް ކުރެއްވި ކަމަށާ، އެ މަދުން ވޯޓު ލިބުނު ކަމުގެ ޒިންމާ ކޮންމެވެސް ވަރަކަށް އެބޭފުޅާ ވެސް ނަގަން ޖެހޭ ކަމަށެވެ.
"އަޅުގަނޑު %56 އިން މޮޅުވާ ވާހަކަ ދެންނެވީމާ ވަރަށް ގިނަ ބޭފުޅުން ވޯޓުލާން ނުގޮސް ތިބި، މޮޅުވާތީ. އެހެންވެ އެކަމަށް ތި އެންމެހާ ބޭފުޅުންގެ އަރިހުން އަޅުގަނޑު މައާފަށް އެދެން،" އޭނާ ވިދާޅުވި އެވެ.
އެ އަދަދަށް އެމްޑީޕީ އަށް ވޯޓު ލިބޭ ކަމަށާއި އެހެން ނަމަވެސް މޮޅުވެފައި އޮތް އިންތިހާބެއްގައި ވޯޓުލާން ގިނަ އަދަދެއްގެ ސަޕޯޓަރުން ނުނިކުންނަ ކަމަށް ފައްޔާޒު ވިދާޅުވިއެވެ. އެހެން ވޯޓުލާން ނުނިކުމެ ތިއްބެވީ ފަސޭހަ އަކަށް ކަމަށް އޭނާ ވިދާޅުވި އެވެ.
"ފަސޭހަ ކަމެއް ނޫން، ވޯޓުލާން ދިޔުމަކީ ބޮޑެތި ކިޔުތަކުގައި ޖެހިގެން،" ފައްޔާޟް ވިދާޅުވި އެވެ.
އެހެން އެކަން ދިމާވީ އިލެކްޝަންސް ކޮމިޝަނުން ވޯޓުލުމުގެ އިންތިޒާމްތައް ރަނގަޅަށް ނުބެލެހެއްޓުމުން ކަމަށާ، އެހެންކަމުން ފައްޔާޟް ވަނީ ވޯޓުލުމުގެ އިންތިޒާމްތައް ރަނގަޅަށް ހަމަ ޖެއްސުމަށް އިލެކްޝަންސް ކޮމިޝަނަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
