ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެންބަރު ހަސަން ޒަރީރަށް ހަމަލާދީ އަވަހާރަކޮށްލަން އުޅުނު ކަމުގެ ތުހުމަތުގައި ހައްޔަރު ކުރި މއ. ނައިޓްވިލާ އިބްރާހިމް އަބްދުالله (ގައްބަރޭ) ދޫކޮށްލުމަށް ޒަރީރް ގޮވާލައްވައިފިއެވެ.

މިދިޔަ މެއި މަހުގެ ފުރަތަމަ ދުވަހުގެ ފަތިހު ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް ޒަރީރަށް, ފަސް މީހުންގެ ގްރޫޕަކުން ވަނީ ހަމަލާދީފައެވެ. މަރުތޭލައަކުން ޖަހައި ބޯ ފަޅާލުމުގެ އިތުރުން އެހެން ބައެއް އަނިޔާތަށް ވެސް އޭނާއަށް ވަނީ ލިބިފައެވެ. 

އެ މައްސަލައިގައި ތުހުމަތުގައި ގައްބަރޭ ހައްޔަރުކޮށް ކްރިމިނަލް ކޯޓަށް ހާޒިރު ކުރުމުން ތަހުގީގީ މަރުހަލާ އަދި ޝަރީއަތް ނިމެންދެން ހައްޔަރު ކުރުމަށް އެ ކޯޓުން ވަނީ އަމުރުކޮށްފައި ވެއެވެ. އެހެންކަމުން އޭނާ މިވަގުތު ހުރީ ޖަލު ބަންދުގައެވެ. 

އެކަމާއި ގުޅިގެން، ޒަރީރު ކުރައްވާފައިވާ ޓްވީޓެއްގައި ވިދާޅުވީ ގައްބަރޭ އަކީ އޭނާގެ ވަރަށް ގާތް އެކުވެރި ރައްޓެއްސެއް ކަމަށެވެ. އެހެންކަމުން ގައްބަރޭ ދޫކޮށްލުމަށް އޭނާ ވަނީ ގޮވާލައްވާފައެވެ. 

"އަޅުގަނޑުގެ މައްސަލާގައި ހައްޔަރުކޮށްފައިވާ ގައްބެ މިނިވަންކޮށް ދެއްވާ. ގައްބެއަކީ އަޅުގަނޑުގެ ވަރަށް ގާތް ރައްޓިއްސެއް." ގައްބަރޭ އާއިއެކު ނަގާފައިވާ ފޮޓޯއެއް ހިއްސާ ކުރައްވައި، ފުލުހުންގެ ރަސްމީ ޓުވިޓާ އެކައުންޓްވެސް ޓެގް ކުރައްވައި ޒަރީރު ކުރެއްވި ޓްވީޓެއްގައި ވިދާޅުވެފައި ވެއެވެ. 

ގައްބަރޭ ހައްޔަރު ކޮށްފައި ވަނީ ގްރޫޕް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގައި، މީހަކު މަރާލަން އުޅުނުކަމަށް ތުހުމަތުކުރެވޭ މައްސަލައެއްގައި ކަމަށް މީގެ ކުރިން ފުލުހުން ވަނީ ބުނެފަ އެވެ. 

ގައްބަރޭ އަކީ އެމްޑީޕީ ގައުމީ މަޖިލީހުގެ މައްޗަންގޮޅީ ދެކުނު ދާއިރާގެ ރައީސެވެ. އޭނާ އަކީ 2007ވަނަ އަހަރު ތޫނު ހަތިޔާރެއް ބޭނުންކޮށްގެން ހ. ކުބުރާ އަލީ އިޝާރު މަރާލުމުގައި ބައިވެރިވިކަމަށް ފުލުހުންގެ ތަހުގީގުގައި އިއުތިރާފް ވެފައިވާ މީހެކެވެ. އޭރު އޭނާގެ އުމުރަކީ 16 އަހަރެވެ. އެ މައްސަލައިގައި ދައުލަތުން ވަނީ އޭނާގެ މައްޗަށް ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ އުފުލައިފައެވެ.

ނަމަވެސް ހެކި ނެތުމުގެ ސަބަބުން އޭނާގެ މައްޗަށް ކުށް ސާބިތު ނުވާކަމަށް 2010ވަނަ އަހަރު ޖުވެނައިލް ކޯޓުން ވަނީ ހުކުމްކޮށްފައެވެ. ޖުވެނައިލް ކޯޓުން ކުރި ހުކުމް ދައުލަތުން ވަނީ ހައިކޯޓުގައި 2012ވަނަ އަހަރުގެ އޭޕްރީލް މަހުގެ 17ވަނަ ދުވަހު އިސްތިއުނާފުކޮށްފައެވެ.