ރިޔާސީ އިންތިހާބުގެ ފުރަތަމަ ބުރުގައި އަމިއްލަ ގޮތުން ވާދަ ކުރެއްވި ފާރިސް މައުމޫންގެ ޓީމެއް އެމްޑީޕީއާ ބައްދަލު ކުރައްވައިފިއެވެ.

ރިޔާސީ އިންތިހާބުގެ އިންތިހާބުގެ ދެވަނަ ބުރާއި ގުޅޭ ގޮތުން ރޭ ކުރިއަށް ގެންދިޔަ އެ މަޝްވަރާތަކަށް ފަހު ފާރިސް ކުރެއްވި ޓްވީޓެއްގައި ވިދާޅުވީ އާމިނަތު ނާދިރާ އިސްވެ ހުންނަވާ އޭނާގެ ޓީމުން ރޭ އެމްޑީޕީގެ ލީޑަޝިޕާ ބައްދަލުކޮށް ގައުމީ ސަލާމަތާއި އިގްތިސާދީ، އިޖުތިމާއީ އަދި ސިޔާސީ އިސްލާހުތަކާއި ގުޅުން ހުރި ސިޔާސަތުތައް ހިއްސާކުރެއްވި ކަމަށެވެ.

"މި ސިޔާސަތުތަކަކީ، އަޅުގަނޑުމެންގެ މިނިވަންކަން ކަށަވަރުކޮށް، ޑިމޮކްރަސީ ހަރުދަނާކުރުމަށާއި، އަދުލުއިންސާފާއި ހަމަހަމަކަން އިތުރުކުރުމަށާއި، ގައުމީ ސަލާމަތާއި އެއްބައިވަންތަކަން ގާއިމުކުރުމަށް މުހިންމު ސިޔާސަތުތަކެއް ކަމަށް އަޅުގަނޑުމެން ގަބޫލުކުރަން." ފާރިސްގެ ޓުވީޓުގައި ވިދާޅުވެފައި ވެއެވެ. 

އެމްޑީޕީގެ އިތުރުން ޕީޕީއެމް/ޕީއެންސީގެ ޓީމާއިވެސް ފާރިސްގެ ޓީމުން ވަނީ ދެވަނަ ބުރުގައި އެކުގައި މަސައްކަތް ކުރުމާއު މެދު މަޝްވަރާ ކޮށްފައެވެ. 

ނިމިދިޔަ ރިޔާސީ އިންތިޚާބުގެ ފުރަތަމަ ބުރުގައި މިނިވަން ކެންޑިޑޭޓެއްގެ ގޮތުގައި ވާދަކުރެއްވި ފާރިސް އަށް 3015 ވޯޓް ލިބިލައްވައިފައިވެއެވެ.