ލީބިޔާގެ ޑަރްނާގައި ހިނގަފައިވާ ފެންބޮޑުވުމުގެ ހާދިސާއާއި ގުޅިގެން މަރުވި މީހުންގެ ޢަދަދު 20،000 އަށް އަރައިގެން ހިނގައިދާނެ ކަމަށް ޑަރްނާގެ މޭޔަރު ޢަބްދުލްމެނަމް އަލް ޤައިޠީ ވިދާޅުވެއްޖެއެވެ.

ފެންބޮޑުވެފައިވާ ޑަރްނާގެ އާންމުން ދަނީ ގެއްލިފައިވާ ޢާއިލާގެ މެމްބަރުން ހޯދުމަށް ކެތްތެރިކަމެއް ނެތި މަސައްކަތް ކުރަމުންނެވެ. ސާރޗް އެންޑް ރެސްކިޔު ޓީމްތަކުން ބޮޑީ ބޭގްތައް ތަންތަނުން ނެރެމުންދާ މަންޒަރާއިއެކު އާއިލާގެ މެމްބަރުން ހޯދުމަށް ކެތްމަދުވެފައިތިބި މީހުންގެ އުންމީދު ދަނީ ފަނޑުވަމުންނެވެ.

އާދަޔާ ޚިލާފަށް ބޮޑުވި ފެންގަނޑާއި އެކު ގިނަ ބަޔަކު މަރުވެ މޫދަށް ގިނަ ބަޔަކު ކަހާލައިގެން ގޮސްފައިވާނެ ކަމަށް އަންނަނީ ލަފާކުރަމުންނެވެ.

އެސަރަހައްދުގައި ހުރި ޑޯމް ހަލާކުވެ ޕްރެޝަރުގައި ވަތް ފެންގަނޑާއި އެކު އުސްކޮށް ހަދައިފައިހުރި ބައެއް ޢިމާރާތް ވެއްޓިގެން ފައިބައިފައިވަނީ އެޢިމާރާތުގެ ތެރޭގައި މީހުން ނިދައިފައި ތިއްބައެވެ.

ލީބިޔާގެ ދާޚީލި ވުޒާރާގެ ތަރުޖަމާނު އޭއެފްޕީ ނިއުސް އަށް ޠާރިޤް އަލް ޚައްރާޒް ވިދާޅުވެފައިވަނީ މެޑިޓޭރިނިއަން ސިޓީ އިން 3840 މީހަކު މަރުވެފައިވާ ކަމަށާއި އޭގެ ތެރެއިން 3190 މީހަކު ވަޅުލެވިފައިވާ ކަމަށެވެ. އަދި އޭގެ ތެރެއިން 400 މީހުންނަކީ ލީބިޔާގެ ރައްޔިތުން ނޫން ކަމަށާއި އޭގެތެރޭގައި ގިނައީ މިޞްރާއި ސޫދާނުގެ ރައްޔިތުން ކަމަށެވެ.

ޑަރްނާގެ މޭޔަރު އަލް ޤައިޠީ ސަޢުދީ ޢަރަބިއްޔާގެ ޓީވީ އަކަށް ވިދާޅުވެފައިވަނީ ޑަރްނާއިން މީހުން މަރުވި ޢަދަދު 18،000 އާއި 20،000 އާއި ދެމެދަށް އަރާނެ ކަމަށް ލަފާ ކުރެވޭކަމަށެވެ.