ބާސެލޯނާގެ ކޯޗު ޒަވީ ހެނާންޑޭޒްގެ އެއްބަސްވުން އައު ކުރިއަށް އެކުލަބުން ނިންމައިފި އެވެ.

ބާސެލޯނާގެ ކޯޗުކަމުގެ މަގާމާއި ޒަވީ ހަވާލުވީ 2021 ވަނަ އަހަރުގެ ނޮވެމްބަރު މަހުގެ ތެރޭގަ އެވެ. އޭގެ ކުރިން އެމަގާމުގައި ހުރީ މަގާމުގައި ހުރީ ނެދަލެންޑްސްގެ ރޮނާލްޑް ކޫމަން އެވެ. ޒަވީގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް 94 މެޗު ކުޅެފަ އެވެ.

އޭގެ ތެރެއިން އެ ޓީމު ވަނީ 58 މެޗުން މޮޅުވެފަ އެވެ. އަދި 19 މެޗަކުން ބަލިވެފައިވާއިރު، 17 މެޗެއް ނިމުނީ އެއްވަރުވެގެންނެވެ. މީގެއިތުރުން ޒަވީގެ އިރުޝާދުގެ ދަށުން ބާސެލޯނާ އިން ވަނީ ދެ ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގު އަދި ސްޕެނިޝް ސުޕަ ކަޕް އެވެ.

ބާސެލޯނާގެ ޑިރެކްޓަރު ޑެކޯ އާއި ހަވާލާދީ މީޑީއާ ރިޕޯޓްތައް ބުނާގޮތުގައި އެކުލަބުން މިހާރު ވަނީ ޒަވީގެ އެއްބަސްވުން އައުކުރުމަށް ނިންމާފައެވެ. އަދި ބާސެލޯނާ އިން ޒަވީ އަށް ފުރިހަމަ އަށް އިތުބާރު ކުރާ ކަމަށާއި، އެ ކުލަބުން މުސްތަޤުބަލަށް ތައްޔާރުވަނީ ޒަވީ އާއެކު ކަަމަށެވެ.

މީގެ ކުރިން ބާސެލޯނާގެ ރައީސް ޖީން ލަޕޯޓާ ވެސް ވަނީ އެ ކުލަބުން ޒަވީ އަށް އައު އެއްބަސްވުމެއް ދޭނެކަން ޔަގީން ކޮށްދީފަ އެވެ. ސްޕެއިންގެ ބައެއް މީޑިއާތަކުގައި ބުނެފައިވާ ގޮތުން ބާސެލޯނާ އިން ޒަވީ އަށް ހުށަހަޅާނީ ފަސް އަހަރު ދުވަހުގެ އެއްބަސްވުމެކެވެ. މިހާރު އެ ކުލަބާއެކު ޒަވީ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.