ވިލާ ފައުންޑޭޝަނުގެ ޗެއާމަން، ގާސިމް އިބްރާހިމްގެ އިރުޝާދުގެ މަތިން ވިލާ ފައުންޑޭޝަނުން ދިވެހި ބަހަށް ތަރުޖަމާކޮށް ނެރުނު ގުރުއާނުގެ ތަފްސީރު ފޮތް، އައްތަފްސީރުލް ވާޟިޙުލް މުޔައްސަރުގެ މިހާރު ލައިވް ކޮށް ކިޔާލެވޭނެ ކަމަށް އެ ފައުންޑޭޝަންއޖބް ބުނެފިއެވެ.

ބަޔާންވެގެންވާ ފަސޭހަ ތަފްސީރުގެ ނަމުގައި ނެރުނު ފޮތަކީ ދިވެހި ބަހުން ނެރުނު ފުރަތަމަ ގުރުއާނުގެ ތަފްސީލީ ތަފްސީރެވެ.

މި ފޮތަކީ ނޮވެމްބަރ 2، 2016 ގައި ގާސިމް އިބްރާހިމް ގެ އިރުޝާދުގެ މަތިން ތަރުޖަމާކުރަން ފެއްޓެވި ފޮތެކެވެ. އަދި މި މަސައްކަތުގައި އެންމެ އިސްކޮށް އުޅުއްވީ އިސްލާމިކް ޔުނިވާސިޓީއިން 1987 ވަނަ އަހަރު ދަސްވެނިވި، އައްޝައިޚް މުހައްމަދު އަބްދުالله އެވެ. އަދި މި ފޮތް ޕްރޫފް ރީޑު ކުރެއްވީ އަބްދުالله އަބްދުލް މުހުސިނާއި އިޔާޒް ނަސީމް އެވެ.

ގާތްގަނޑަކަށް 2 އަހަރު ދުހަވުގެ ތެރޭގައި ތަރުޖަމާކޮށް ނިންމި މި ފޮތުގައި 6600 އަށްވުރެ ގިނަ ސަފްހާ ހިމެނެއެވެ. އަދި މި ފޮތުގެ ވެބްސައިޓް ވަނީ މިހާރު ލައިވް ކުރެވިފައެވެ. މި މަސައްކަތް ކުރިއަށް ގެންދެވީ އެ ފޮތް ޗާޕު ކުރާއިރު އޭގައި އެއްވެސް ކުށެއް ނޯންނާނެކަން ޔަގީން ކުރުމަށްޓަކައި ކަމަށް ގާސިމް އިބްރާހިމް ވަނީ ވިދާޅުވެފަ އެވެ. 

މި ތަފްސީރު މިހާރު www.quranthafseeru.com އަށް ވަޑައިގެން މި ތަފްސީރު މުދައްރިސުން، ދަރިވަރުން އަދި އެންމެހާ ބޭފުޅުންނަށްވެސް ބައްލަވާލެވެން އޮންނާނެ ކަމަށާ، އަދި މި ތަފްސީރުގައި ކުށެއް އޮތްކަން ފާހަގަ ވެއްޖެނަމަ އެކަން ވިލާ ފައުންޑޭޝަނަށް އަންގަވައިލަދެއްވުމަށްވެސް ޤާސިމް އިބްރާހިމް އިލްތިމާސް ކުރެއްވިއެވެ. 

މުސްތަޤްބަލުގައި މި ޤުރުއާނުގެ ތަފްސީރުގެ އެޕްލިކޭޝަނެއް އައިފޯން އަދި އެންޑްރޮއިޑް އަށްވެސް ނެރޭނެ ވާހަކަ ވެސް ގާސިމް ވަނީ ވިދާޅުވެފަ އެވެ. 

ވީހާވެސް ގިނަ އަދަދެއްގެ ބޭފުޅުންނެއް މި ޤުރުއާނުގެ ތަފްސީރު ކިއުން އެއީ ވިލާ ފައުންޑޭޝަނާއި މި މަސައްކަތް ކުރުމަށް އެހީތެރިވި އެންމެހާ ބޭފުޅުންގެވެސް ވަރަށް ބޮޑު އެދުމެއް ކަމަށް އެ ފައުންޑޭޝަންއިން ބުނެއެވެ.