ކުޑަ ކުއްޖެއްގެ ބަރަހަނާ ވީޑިއޯއެއްގެ މައްސަލާގައި ރެއާލް މެޑްރިޑްގެ ޒުވާން ތިން ކުޅުންތެރިއަކު ސްޕެއިންގެ ފުލުހުން ހައްޔަރުކޮށްފި އެވެ.

މިހާދިސާ ހިނގާފައި މިވަނީ މިދިޔަ މަހު އޮސްޓްރޭލިޔާ އާއި ނިއުޒިލޭންޑުގައި ބޭއްވުނު އަންހެނުންގެ ވޯލްޑް ކަޕް ކާމިޔާބުކުރި ސްޕެއިންގެ ގައުމީ އަންހެން ޓީމުގެ ޖެނީ ހަރްމޯސޯގެ ތުންފަތުގައި ފުޓުބޯޅަ ފެޑެރޭޝަންގެ ކުރީގެ ރައީސް ލުއިސް ރުބިއަލެސް ބޮސްދިން މައްސަލާގައި ދިމާވި ފިއްތުންތަކާއި ގުޅިގެން އޭނާ މަގާމުން އިސްތިއުފާދީފައި ވަނިކޮށެވެ.

ރިޕޯޓްތައް ބުނާ ގޮތުން މި މައްސަލައިގެ ތަހުގީގަށް ހައްޔަރުކޮށްފައި ވަނީ ސްޕެއިންގެ އެންމެ ބޮޑު ކުލަބުގެ ތިން ވަނަ ޓީމު ކަމަށްވާ ރެއާލް މެޑްރިޑް ސީ ގެ ތިން ކުޅުންތެރިން ނެވެ. ކެޑެނާ އެސްއީއާރް ރޭޑިއޯ ސްޓޭޝަނުން ރިޕޯޓްކޮށްފައިވާ ގޮތުގައި އޭގެ ތެރެއިން އެއް ކުޅުންތެރިއަކު ވަނީ އޭނާގެ ބައިވެރިއާއެކު ގުޅުންހިންގި މަންޒަރު ވީޑިއޯ ކޮއްފައެވެ.

Advertisement

އެލް ކޮންފިޑެންޝަލް އާއި ކެޑެނާ އެސްއީއާރް އިން ރިޕޯޓްކޮށްފައިވާ ގޮތުގައި އަނެއް ދެ ކުޅުންތެރިން ވަނީ މޯބައިލް މެސެޖިން އެޕް ވަޓްސްއެޕް މެދުވެރިކޮށް ކުޑަކުއްޖާގެ ރުހުމަކާ ނުލައި ވީޑިއޯ އެހެން ރައްޓެހިންނާއި ހިއްސާކޮށްފައެވެ.

ރިޕޯޓްތައް ބުނާ ގޮތުން މި ތިން މީހުން ވެސް މެޑްރިޑްގައި ބަންދުކޮށްފައި ވަނީ ސްޕެއިންގެ ޖިނާއީ ގާނޫނުގައި "ޖިންސީ ބާވަތެއްގެ ސިއްރުތައް ހާމަކުރުން" ކަމަށް ބުނާ ކުށެއް ކުރި ކަމުގެ ތުހުމަތުގަ އެވެ.