ދޮގު ވާހަކަ ތަކާއި، ދޮގު ޚަބަރުތައް ފެތުރުމަކީ މާތް الله ހަރާމް ކުރައްވާފައިވާ ކަމެއް ކަމަށާ، އެކަމުގެ ނުބައިކަން މީހުން މެރުމަށްވުރެ ބޮޑު ކަމަށް މިއަދުވެ ޚުތުބާގައި ބުނެފިއެވެ.
މިއަދުގެ ޚުތުބާގައި އަލި އަޅުވާލާފައި ވަނީ ދޮގު ވާހަކަތަކާއި ދޮގު ޚަބަރުތައް ފެތުރުމުގެ މައްޗަށެވެ.
އެގޮތުން ޚުތުބާގައި ބުނީ، މުޖުތަމަޢު ފަސާދަކޮށް، ރަނގަޅު މަގަށް ހުރަސްއެޅުމަށް މީހުން ބޭނުންކުރާ އެންމެ ނުރައްކާތެރި ވަސީލަތަކީ، ދޮގު ވާހަކަތަކާއި ދޮގު ޚަބަރުތައް ފެތުރުން ކަމަށެވެ. އެކަން ރަސޫލު ބޭކަލުންގެ ސިރާތަށް ބަލާއިރު، އެބޭކަލުންނާ ދެކޮޅުވެރި މީހުންގެ އަމަލުތަކުން ހާމަވާ ކަމަށް ޚުތުބާގައި ބުންޏެވެ.
މިއާއެކު ޚުތުބާގައި ބުނީ، ދޮގު ޚަބަރުތަކާއި، ދޮގު ވާހަކަތައް ފެތުރުމަކީ މީސްތަކުންނަށް ހައްގު އޮޅުވާލާ، ހަމަ މަގުން އެއްކިބާ ކޮށްލާނެ ކަމެއް ކަމަށެވެ. އަދި އެ ކަމުގެ ނުބައިކަން، މީހުން މެރުމަށްވުރެ ބޮޑު ކަމަށް ޚުތުބާގައި ބުނެފައިވެއެވެ.
"ދޮގު ޚަބަރުތަކާއި، ދޮގު ވާހަކަތައް ފެތުރުމަކީ މީސްތަކުންނަށް ހައްގު އޮޅުވާލާނެ ކަމެކެވެ. މީސްތަކުން ހަމަ މަގުން އެއްކިބާ ކޮށްލާނެ ޢަމަލެކެވެ. އެކަމުގެ ނުބައިކަން، މީހުން މެރުމަށްވުރެ ބޮޑެވެ. އެކަމުގެ ސަބަބުން މީސްތަކުންގެ މެދުގައި ފިތުނަވެރިކަން އުފެދޭތީއެވެ. މާތް الله ވަޙީކުރައްވާފައި ވެއެވެ. "ޤަތުލު ކުރުމަށްވުރެ ފިތުނަވެރިކަމުގެ ނުބައިކަށް ބޮޑެވެ."
ހުކުރު ޚުތުބާ
"މީހަކު ޤަތުލު ކުރުމަށް ވުރެ ފިތުނަވެރިކަން ބޮޑުވަނީ ކީއްވެގެން ހެއްޔެވެ؟ ޤަތުލުގެ ސަބަބުން ގެއްލުން ލިބެނީ ހަމައެކަނި އެ ފަރުދަށް ނުވަތަ އާއިލާ އަށް ކަމަށް ވެފައި، ފިތުނައިގެ ސަބަބުން މުޅި މުޖުތަމައަށް ގެއްލުން ލިބޭނެތީއެވެ." ޚުތުބާގައި ބުނެފައިވެއެވެ.
ޚުތުބާގައި ބުނީ، ދޮގު ވާހަކަތައް ފަތުރާ މީހުންނަށް ކީރިތި ގުރުއާނުގައި ދީފައިވާ ނަމަކީ "މުރްޖިފުން" ކަމަށެވެ. އަދި މުރްޖިފުންނަކީ މީސްތަކުންފެ މެދުގައި ގަޑުބަޑު އުފައްދާ މީހުން ކަމަށްވެސް ޚުތުބާގައި ބުނެފައިވެއެވެ. އަދި ދޮގު ހަބަރު ފަތުރާ މީހުންނަކީ މުޖްތަމައުގައި ހިމެނޭ ވިހަ ގުނަވަނެއްގެ ގޮތުގައި ހުތުބާގައި ވަނީ ސިފަކޮށްފައެވެ.
އެހެން ކަމުން އެންމެންނަކީވެސް ދޫ ރައްކާތެރިކޮށް، ފިތުނަ ފަސާދަ އުފެއްދުމުން ދުރުހެލިވާ ބަޔަކަށް ވުން އެދި ޚުތުބާގައި ވަނީ ދުއާކޮށްފައެވެ.
Advertisement
This content is created and paid for by advertisers and does not involve Voice Journalists
