ހުޅުމާލޭގައި ޒަމާނީ ފެންވަރުގެ ތެލެސީމިއާ ސެންޓަރެއް ގާއިމްކޮށްދެއްވާނެ ކަމަށް އިިދިކޮޅު ޕީޕީއެމް-ޕީއެންސީ ކޯލިޝަންގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރޭ އދ. މަހިބަދޫގައި ބޭއްވި ކެންޕެއިން ޖަލްސާގައި ވާހަކަފުޅުދައްކަވަމުން މުއިއްޒު ވިދާޅުވީ، ޕީޕީއެމް/ޕީއެންސީން ގާއިމް ކުރަން ބޭނުންވާ ސަރުކާރަކީ އޯގާތެރި ސަރުކާރެއް ކަމަށެވެ. އަދި އެ ސަރުކާރުގެ ތެރެއިން، މުޖުތަމައުގައި މާ ބޮޑު ސަމާލުކަމެއް ނުދެވި ތިބޭ މީހުންނަށްވެސް ޚާއްސަ ސަމާލުކަމެއް ދެއްވާނެ ކަމަށް މުޢިއްޒު ވިދާޅުވި އެވެ. 

އެގޮތުން، ނިޒާމުގެ ތެރެއިން ތެލަސީމިއާ ކުދިންނަށް ހިލޭ ބޯންމެރޯ ހެދޭނެގޮތް އެމަނިކުފާނުގެ ވެރިކަމެއްގައި ހަމަޖައްސަވާނެ ކަން މީގެ ކުރިންވެސް އިއުލާން ކުރައްވާފައިވާނެ ކަން މުޢިއްޒު ފާހަގަކުރެއްވި އެވެ. 

މިއާއެކު މުޢިއްޒު ވިދާޅުވީ، ތެލެސީމިއާ ސެންޓަރަށް، ތެލެސީމިއާ ކުދިން ހަފްތާއަކު ދެ ފަހަރު ނުވަތަ ތިން ފަހަރު ލޭ އަޅަންދާން ޖެހޭ ކަމަށެވެ. ނަމަވެސް އެތަނުގެ ހާލުވެސް ވަރަށް ގޯސްކަމަށާ، ދާ މީހުންނަށްވެސް އެތަން ވަނީ ވަރަށް "ޕެއިން ފުލް" ތަނަކަށް ކަން މުއިއްޒު ފާހަގަ ކުރެއްވިއެވެ. 

"ކުޑަކުދިން މި ދަނީ ގިނައިން އެ ސެންޓަރަށް. މި ސަރުކާރު އައި ފަހުން މިކަން އިތުރަށް ގޯސްވީ. ޔާމީންގެ ވެރިކަމުގައި ތެލްސީމިއާގައި މަދުވާ އަދަދު ވަރަށް ބޮޑުތައް ކުޑަކުރެވުނު. ނަމަވެސް މިހާރު ހުރީ ކުދިން މަރުވާ ރޭޓް 22 އިންސައްތައިގަ." މުޢިއްޒު ވިދާޅުވިއެެވެ. 

އެހެންކަމުން މުއިއްޒު ވިދާޅުވީ އެންމެ ފެންވަރު ރަނގު، އެންމެ ރަނގަޅު ހިތުމަތްތައްދެވޭ ޖާގަ ބޮޑު ތެލެސީމިއާ މަރުކަޒަރެއް ހުޅުމާލޭގެ ބޮޑު ބިމެއްގައި ގާއިމްކޮށްދެއްވާނެ ކަމަށެވެ. 

މީގެ އިތުރުން މުއިއްޒު ވިދާޅުވީ މާލޭގައި ހުންނަ ޑައިލެސިސް ސެންޓަރަކީ މިހާރު ވަރަށް ނިކަމެތި ކޮށް އޮތް ތަނެއް ކަމަށެވެ. އެތަނަކީ އެކަމުގައި ވަރަށް ގިނަ ރައްޔިތުންދާ ތަނެއް ކަމަށާއި ހާއްސަކޮށް ގިނަ އަދަދެއްގެ ކުޑަކުދިން ގޮސް ތިބޭ ތަނެއް ކަމަށެވެ. ނަމަވެސް ސަރުކާރުން އެއްގޮތަކަށް ވެސް އެތަނަށް ސަމާލުކަމެއް ނުދޭ ކަމަށެވެ.

އެހެންކަމުން އެމަނިކުފާނުގެ ވެރިކަމެއްގައި އެންމެ ޒަމާނީ، އިންޓަނޭޝަން ފެންވަރުގެ ފުރިހަމަ ތަނަވަސް ޑައިލެލިސް ސެންޓަރެއް މާލޭގައި ގާއިމްކޮށްދީ އަދި ރާއްޖޭގެ އެކި މުހިންމު ސަރަހައްދުތަކުގައި ގާއިމްކޮށްދެއްވާނެ ކަމަށް މުޢިއްޒު ވަނީ ވިދާޅުވެފަ އެވެ.