މި ސަރުކާރުން ހުޅުމާލޭ ދެވަނަ ފިޔަވަހިން ދިން ގޯތިތައް، ސަރުކާރުން ދޫކުރި ގޮަތަށް ދެއްވާނެކަމުގެ ޔަގީންކަން ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ދެއްވައިފި އެވެ.
ޑރ މުއިއްޒު މިފަދައިން ވިދާޅުވެފައި ވަނީ ހުޅުމާލޭ ދެވަނަ ފިޔަވައްސަށް ރިޔާސީ ކެމްޕޭނަށް ވަޑައިގެން ހިޔާ ފްލެޓުތަކުގައި ދިރިއުޅޭ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.
އެމަނިކުފާނު ވިދާޅުވީ މި ސަރުކާރުން ދޫކޮށްފައިވާ އެއްވެސް ގޯއްޗެއް އަތުނުލާނެ ކަމުގެ ޔަގީންކަން ދެއްވާ ކަމަށެވެ. އަދި ގޯތި ދޫކޮށްފައިވާ ތަންތަނުން ގޯތި ދޫކުރައްވާނެ ކަމަށާއި، އެއާއެކު ވެސް ހުޅުމާލެ ދެވަނަ ފިޔަވައްސަކީ ޒަމާނީ ސިޓީއެއްގެ ސިފަ ޖެހިގެންދާނެ ޝަހަރަކަށް ހައްދަވާދެއްވާނެ ކަމުގެ ޔަގީންކަން ވެސް ދެއްވާނެ ކަމަށެވެ.
ޑރ މުއިއްޒު ހިޔާ ސަރަހައްދުގެ ރައްޔިތުންނާއި މުޚާތަބުކުރައްވާ ވާހަކަދައްކަވަނީ
"އަޅުގަނޑުމެން އިރާދަކުރެއްވިއްޔާމު މިތަނުން ދީފައިވާ ގޯތިތަކަށް ވާ ޖާގަ ހަމަ އެގޮތަށް ޔަގީންކޮށްދީފައި ބާކީ އޮންނަ ޖާގަ އިރާދަކުރެއްވިއްޔާ ރީތިކޮށް ޕްލޭންކޮށް މީ ހިތްގައުމު ސަހަރެއްގެ ގޮތުގައި އަޅުގަނޑުމެން ކުލަ ޖައްސަދޭނަން. މި ތަނުން ދޫކޮށްފި ގޯތިތަކެއް ހަމަ ކަށަވަރުކޮށްދެނީ އިރާދަކުރެއްވިއްޔާ އެ ގޯތިތައް ދިން ތަނަކުން އިރާދަކުރެއްވިއްޔާ އެ ގޯތިތައް ހަމަ އެގޮތަށް އޮންނާނެ. އެ ފަރާތްތަކަށް އެ ޔަގީންކަން އޮންނާނެ"
ޑރ މުހައްމަދު މުއިއްޒު
ޑރ މުއިއްޒުގެ ވާހަކައިގައި ވަނީ ހިޔާ ފްލެޓުތަކަށް ދިމާވެފައިވާ މައްސަލަތައް ޙައްލުކޮށްދެއްވާނެ ކަމުގެ ފުރިހަމަ ޔަގީންކަން ވެސް ދެއްވާފަ އެވެ.
އެގޮތުން ހިޔާ ފްލެޓުގެ ކުލި ރައީސް ޔާމީނުގެ ސަރުކާރުން ކަނޑައަޅުއްވާފައިވާ 5600 ރުފިޔާއަށް ތިރިކޮށްދެއްވާނެ ކަމަށް ޑރ މުއިއްޒު ވަނީ ވިދާޅުވެފަ އެވެ. އަދި ހިޔާ ފްލެޓުގެ ފިނިޝިން މަސައްކަތް ނުނިންމާ މި ސަރުކާރުން ހަވާލުކުރުމުގެ ސަބަބުން، އެ ތަންތަނުގެ ފިނިޝިން މަސައްކަތް ކުރުމަށް އަމިއްލަ ޖީބުން ކުރަން ޖެހުނު ޚަރަދު ޖުމްލަކޮށް، ދެއްވާނެކަމަށް ޑރ މުއިއްޒު ވަނީ ވިދާޅުވެފަ އެވެ.
ޑރ މުއިއްޒު ވިދާޅުވީ ހުޅުމާލެ ދެވަނަ ފިޔަވަހި ރައީސް ޔާމިނުގެ ޒައާމަތުގައި އެކުލަވާލާފައި އޮތް މާސްޓާ ޕްލޭނާއި އެއްގޮތަށް ތަރައްގީކުރުމަށް މި ސަރުކާރަށް އެކަށީގެންވާ މުއްދަތެއް ލިބިގެން ދިޔަ ކަމަށެވެ.
އެހެން ނަމަވެސް އެ ޕްލޭނުގައިވާ އެއްވެސް ކަމެއް ސަރުކާރަށް ތަރައްގީކޮށް ދެވިފައި ނުވާއިރު، ހިޔާ ސަރަހައްދުގައި އާބާދުވަމުން ދިޔަ ރައްޔިތުންނަށް ބޭނުންވާ އަސާސީ ޚިދުމަތްތައް ވެސް މި ސަރުކާރަށް އެކަށީގެންވާ ރަނގަޅު ފެންވަރެއްގައި ފޯރުކޮށްދެވިފައި ނުވާކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ، ސަރުކާރުން ގޯތި ދޫކޮށްފައިވާ ގޮތަށް، ގޯތިތައް ދިނުމަށްފަހު، ހުޅުމާލެ ސިޓީ ތަރައްގީކުރުމަށް އޮތް ޕްލޭނުގައި ހުރި ކަންކަން ތަންފީޒުކޮށް، އެ ތަނަކީ ޒަމާނީ ފެންވަރުގެ ރީތި ސިޓީއެއްގެ ގޮތުގައި ތަރައްގީކޮށްދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
