ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މާދަމާ ޕީޕީއެމްގެ ރައީސް، ރައީސް އަބްދުﷲ ޔާމިން އަބްދުލްގައްޔޫމާއި ބައްދަލު ކުރުމަށް މަސައްކަތް ކުރަމުންދާކަމަށް އެމަނިކުފާނު ވިދާޅުވެއްޖެއެވެ.

ދަ ޑިމޮކްރެޓްސްގެ މެމްބަރުންނާއި ބައްދަލުކުރައްވައި މިއަދު މެންދު ދޮންމަނިކު ސްކައި ވިއުގައި ބޭއްވި ފަރިއްކޮޅެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ މިއީ ވަރަށް ޚައްސާސް ދަނޑިވަޅެއްކަމަށާއި އިންތިޚާބުގެ ފުރަތަމަ ބުރުގެ ނަތީޖާ ލިބިފައިވާ ގޮތުން ދެވަނަ ބުރަކަށް އޮތީ ދާން ޖެހިފައިކަމަށެވެ.

އަނެއްކާވެސް މިވަނީ ކުރިއެކޭވެސް އެއްގޮތަށް ބަލިވި ޕާޓީތަކާއި ލީޑަރުންނާއި ބައިއަތު ހިފައި ކޯލިޝަން ހަދައިގެން ވެރިކަން ހޯދަން ޖެހިފައިކަމަށާއި މިއީ ޤާނޫނު އަސާސީ ދަންނަ ރޫހެއް ނޫންކަމަށާއި، މިކަން މިގޮތަށް ކުރުމުން ޕާޓީތަކަށާއި، ޢާންމު މެމްބަރުންނަށް ފަހުން ލިބޭ ގެއްލުން މާބޮޑުކަމަށް ނަޝީދު ދެއްކެވި ވާހަކަފުޅުގައި ވަނީ ވިދާޅުވެފައެވެ. 

Advertisement

މާދަމާ މާފުއްށީ ޖަލަށް ވަޑައިގެން ރައީސް ޔާމީނާއި ބައްދަލު ކުރެވޭނެ އިންތިޒާމު ހަމަޖެއްސުމަށް މަޖިލީހުގެ އަމީން އާންމު އަރިހުން އެދިފައިވަނީ ރާއްޖޭގެ މިހާރު އޮތް ވެރިކަމުގެ ނިޒާމު ބަދަލު ކުުރުމާއި ގުޅޭގޮތުން މަޝްވަރާ ކުރެއްވުމަށް ކަމުގައި ރައީސް ނަޝީދު ވިދާޅުވިއެވެ.

ވެރިކަމުގެ ނިޒާމު ބަދަލު ކުރުމަށްޓަކައި ރައްޔިތުންގެ ފެންނަ ނުފެންނަ ވޯޓެއް ނެގުމަށް މިވަގުތަކީ އެންމެ މުނާސަބު ވަގުތުކަން ފާހަގަކުރައްވައި ނަޝީދު ވިދާޅުވީ، އެކަން މިމަހުގެ 25 ވަނަ ދުވަހުގެ ކުރިން ކުރުމަށް ދެވަނަ ބުރުގައި އޮތް ދެޕާޓީއަށްވެސް ހުށަހަޅާފައިވާކަަމަށެވެ. އޭގެ ތެރެއިން ޕީޕީއެމްއިން މިކަންކަމަށް އަގަބަހުން އެއްބަސްވި ނަމަވެސް ލިޔުމުން ސޮއި އަޅަން ބޭނުން ނުވާކަމަށެވެ. އަދި އެމްޑީޕީއާއި މިމަޝްވަރާ ކުރަމުންދާއިރު މާބޮޑު ކުރިއެރުމެއް ލިބިފައި ނުވާކަމަށް ވެސް ނަޝީދު ވަނީ ވިދާޅުވެފައެވެ. 

މިކަން ކުރުމަށްޓަކައި ރައީސް ޔާމީންގެ މަޝްވަރާ ހޯދުމަކީ ކޮންމެހެން މުހިންމު ކަމެއްކަަމަށް ދެކޭ ކަމުގައި ރައީސް ނަޝީދު ވިދާޅުވިއެވެ. އެގޮތުން މާދަމާ ރައީސް ޔާމީނާއި ބައްދަލު ކުރުމަށް މާފުށީ ޖަލަށް ވަޑައިގަންނަވަން އިންތިޒާމު ހަމަޖެއްސުމަށް މަޖިލިސް އަމީން އާންމަށް ދަންނަވާފައިވާނެކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދަކީ ދައުލަތުގެ ތިން ބާރުގެ ތެރެއިން އެއްބާރުގެ ވެރިޔާއަށް ވުމުން ރައީސް ނަޝީދަށް މިބައްދަލުވުން ކުރިއަށް ގެންދިއުމަށް އެއްވެސް ހުރަހެއް ގާނޫނު އަސާސީގައި ނޯންނާނެއެވެ.