ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރީ-ރެޖިސްޓާރ ކުރި މީހުންގެ އަދަދު ކުއްލިއަކަށް މަތިވި މައްސަލަ ބަލަން ޖެހޭ ކަމަށް ރައްޔިތުންގެ މަޖިލީހުގެ ނާއިބު ރައީސް އީވާ އަބްދުالله ވިދާޅުވެއްޖެއެވެ. 

ރިޔާސީ އިންތިހާބު 2023 ގެ ދެވަނަބުރުގެ ރީ-ރެޖިސްޓްރޭޝަން ހުޅުވާލެވުނުފަހުން، މިހާތަނަށް 25,000 އަށްވުރެ ގިނަ މީހުން ވޯޓުލާން ރީ-ރެޖިސްޓާރ ކޮށްފައިވާ ކަމަށް އިލެކްޝަންސް ކޮމިޝަނުން މިއަދު ވަނީ ބުނެފައެވެ. 

އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ކުރެއްވި ޓްވީޓެއްގައި ވިދާޅުވީ، ދެވަނަ ބުރުގެ ރީ-ރެޖިސްޓްރޭޝަން އަށް ހުޅުވާލުމާއެކު، ފުރަތަމަ ދުވަހު 9206 މީހުން ރީ-ރަޖިސްޓަރީ ކުރަން ފޯމު ހުށަހެޅި ކަމަށާ، އަދި ދެވަނަ ދުވަހު 16287 ފޯމު ހުށަހަޅާފައިވާ ކަމަށެވެ.

"މިހާތަނަށް ޖުމްލަ 25493 ރީ-ރަޖިސްޓަރީ ކުރަން ހުށަހަޅާފައިވޭ." ހަބީބު ވިދާޅުވި އެވެ. 

އެކަމާއި ގުޅިގެން އީވާ ކުރެއްވި ޓްވީޓެއްގައި ވިދާޅުވީ، ފުރަތަމަ ބުރުގައި ވޯޓުލުމަށް ރީ ރެޖިސްޓާ ކުރަން ޝައުގެއް ނެތުމަށްފަހު، ކުއްލިއަކަށް ދެވަނަ ބުރުގައި ރީ ރެޖިސްޓާ ކުރި މީހުންގެ އަދަދު މަތިވުމުން ސުވާލު އުފެދޭ ކަމަށެވެ. 

ވަކިން ޚާއްސަކޮށް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިންގެ ތެރޭގައި، ރިޝްވަތާއި، ކޮރަޕްޝަނާއި، ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރުން ފަދަ ކަންކަން ހިމެނޭއިރު، މިފަދަ ކަންކަމާއިމެދު އިލެކްޝަންސް ކޮމިޝަނުން ފަރުވާ ކުޑަ ކޮށްލައިގެން ނުވާނެ ކަމަށްވެސް އީވާ ވިދާޅުވި އެވެ. 

އީވާ މިފަދައިން ވިދާޅުވެފައި ވާއިރު، މީހުންނަށް ނޭނގި ރީ ރެޖިސްޓާވާ ވަރަށް ގިނަ މައްސަލަތަކެއް އަންނަނީ ފެންމަތިވަމުންނެވެ. އަދި އެފަރާތްތަކުން އަންނަނީ މީސް މީޑިއާގައި އެކަމާއި މެދު ކަންބޮޑުވުން ފާޅުކުރަމުންނެވެ. 

އެ މައްސަލައިގައި އިދިކޮޅުުން ވަނީ، އެއީ ރައީސް ޞާލިހު ބަލިވާނެ ކަން އެނގުމުން އިންތިހާބު ވަގަށް ނަގަން ކުރައްވާ މަސައްކަތެއްގެ ގޮތުގައި ސިފަ ކޮށްފައެވެ.