ކެމްޕެއިން ހަރަކާތްތަކުގެ ތެރެއިން ކެނޑިޑޭޓާއި ބެހޭ ގޮތުން ހަޤީގަތާއި ޚިލާފު ވާހަކަތައް ފަތުރައި ރުޅިވެރިކަން އުފައްދަން މަސައްކަތް ކުރުމަކީ އިންތިހާބީ ކުށެއް ކަމަށާ އޭގެ އަދަބަކަށް ޖަލަށްވެސް ލެވޭނެ ކަމަށް އިލެކްޝަން ކޮމިޝަންގެ ނާއިބު ރައީސް އިސްމާއިލް ހަބީބް ވިދާޅުވެއްޖެއެވެ.
ހަބީބް ކުރެއްވު ޓުވީޓެއްގައި ވިދާޅުވީ، ކެންޕޭން ހަރަކާތްތަކުގެ ތެރެއިން، ކެނޑިޑޭޓުންގެ ހައްޤަށް އުނިކަން އަންނަ ހަޤީގަތާއި ޚިލާފު ވާހަކަތަކާއި އެފަދަ ވާހަކަތައް މީޑިޔާއިން ދައްކައި، އާއްމުންގެ މެދުގައި ރުޅިވެރިކަން އުފެއްދުމަށް މަސައްކަތް ކުރުމަކީ އަދަބު ކަނޑައެޅިގެންވާ އިންތިޚާބީ ކުށެއް ކަމަށެވެ.
މިފަދަ އަމަލެއް ހިންގައިފި މީހަކަށް އަދަބެއްގެ ގޮތުން 4 މަހާއި 1 އަހަރުގެ މުއްދަތަށް ޖަލަށް ލުން ނުވަތަ 4،000 ރުފިޔާ އާއި 12،000 ރުފިޔާ ދެމެދުގެ އަދަދަކަށް ޖޫރިމަނާ ކުރެވޭނެ ކަމަށް ހަބީބް ވަނީ ވިދާޅުވެފައެވެ.
ހަބީބު މިފަދައިން ވިދާޅުވެފައިވާއިރު، އެމްޑީޕީ ގެ ފަރާތުންނާއި ޕީޕީއެމްގެ ފަރާތުންވެސް އަންނަނީ އެއް ކެންޑިޑޭޓެއް އަނެއް ކެންޑިޑޭޓަށް އެކި ތުހުމަތުތައް ކުރަމުންނެވެ.
ޚާއްޞަކޮށް ވެރިކަންކުރާ އެމްޑީޕީއަށް ތާއީދުކުރާ ބައެއް މީޑިއާ ތަކާއި އަދި އެ ޕާޓީގެ ކެންޕެއިން ހަރަކާތްތަކުގެ ތެރެއިންވެސް އެމްޑީޕީއާއި ގުޅިފައިވާ ކޯލިޝަނުން އަންނަނީ މުޢިއްޒު އާއި ރަނިންމޭޓަށް ވަރަށް ގިނަ ތުހުމަތުތައް ކުރަމުންނެވެ.
Advertisement
This content is created and paid for by advertisers and does not involve Voice Journalists
