ރިޔާސީ އިންތިޚާބުގެ ދެވަނަ ބުރަށް ކޯލިޝަން ހެދުމާއި ގުޅޭ ގޮތުން ގޮތް ނިންމުން އޮންނާނެ ކަމަށް އެޕާޓީ އިން ބުނެފިއެވެ.

ދަ ޑިމޮކްރެޓްސް އިން ބުނެފައިވަނީ އެޕާޓީގެ އިންޓެރިމް ކައުންސިލްގެ ހަތްވަނަ ބައްދަލުވުން މިރޭ އޮންނައިރު އެބައްދަލުވުމުގައި ރިޔާސީ އިންތިޚާބުގައި ކޯލިޝަން ހަދާނީ ކޮން ބަޔަކާއި އެކުކަން ނިންމާނެ ކަމަށެވެ.

މި ބައްދަލުވުން އޮންނާނީ މިރޭ 9:00 ގައި ބިލަބޮން ހައި އިންޓަރނޭޝަނަލް ސްކޫލްގައި ކަމަށްވެސް އެޕާޓީ އިން ބުނެފައިވެއެވެ.

Advertisement

އިންތިޚާބުގެ ދެވަނަ ބުރުގެ ވޯޓުލުން 30 ވަނަ ދުވަހު އޮންނައިރު އިންތިޚާބުގެ ދެވަނަ ބުރުގައި ވާދަކުރައްވަން ހަމަޖެހިފައިވަނީ ޕީއެންސީ ޕީޕީއެމް ގެ ކެންޑިޑޭޓް ޑރ މުޙައްމަދު މުޢިއްޒު އާއި އެމްޑީޕީގެ ކެންޑިޑޭޓް ރައީސް އިބްރާހިމް މުޙައްމަދު ޞާލިޙުއެވެ.

އިންތިޚާބުގެ ފުރަތަމަ ބުރުގައި ވާދަކުރު 8 ކެންޑިޑޭޓުން ތެރެއިން އެދެބޭފުޅުން ދެވަނަ ބުރުގައި ވާދަކުރައްވާއިރު އަނެއް 6 ކެންޑިޑޭޓުންގެ ތެރެއިން އެމްއެންޕީގެ ކެންޑިޑޭޓު މުޙައްމަދު ނާޒިމް ވަނީ ޕީއެންސީ ޕީޕީއެމް އާއި އެކު ކޯލިޝަން ހަދައިފައެވެ.

ޖޭޕީގެ ކެންޑިޑޭޓް ޤާސިމް އިބްރާހިމް ވަނީ އެއްވެސް ބަޔަކަށް ތާއީދު ނުކުރުމަށް ނިންމައިފައެވެ. އަމިއްލަ ކެންޑިޑޭޓް ޒަމީލްވެސް ނިންމެވީ އެއްވެސް ބޭފުޅަކަށް ތާއީދު ނުކުރުމަށެވެ.

ޑިމޮކްރެޓްސް އިން މިރޭ ގޮތެއް ނިންމާނެ ކަމަށް  ބުނެފައިވާއިރު، އަމިއްލަ ކެންޑިޑޭޓް އަހްމަދު ފާރިސް މައުމޫން އަދި ގޮތެއް ނިންމަވައިފައެއް ނުވެއެވެ.

އަމިއްލަ ކެންޑިޑޭޓް ޢުމަރު ނަސީރު ވަކި ގޮތެއް ނުނިންމަވައި މިހާރު ވަނީ 2028ގެ އިންތިޚާބުގެ ތައްޔާރީތައް ފައްޓަވައިފައެވެ.