ރިޔާސީ އިންތިހާބުގެ ދެވަނަބުރުގައި ވޯޓުލުމުގެ ހައްޤު ލިބިފައިވާ މީހުންގެ ލިސްޓު އާންމުކުރުމަށްފަހު އެ ލިސްޓު ޗެކްކުރުމަށް ދެ ދުވަހުގެ މުއްދަތެއް ދެވޭނެ ކަމުގައި އިލެކްޝަންސް ކޮމިޝަނުގެ ރައީސް ފުވާދު ތައުފީގް ވިދާޅުވެއްޖެއެވެ.
ފުވާދު މިއަދު ކުރެއްވި ޓުވީޓެއްގައި ވިދާޅުވީ، އިލެކްޝަންސް ކޮމިޝަނުން ވޯޓުލުމުގެ ހައްޤު ލިބިގެންވާ މީހުންގެ ލިސްޓު އާންމުކުރުމަށްފަހު އާންމުފަރާތްތަކާއި، ސިޔާސީ ޕާޓީތަކުގެ އިތުރުން ކެނޑިޑޭޓުންނަށް އެ ލިސްޓު ޗެކްކުރުމަށް ދެދުވަސް (48 ގަޑިއިރު) ދެވޭނެކަމަށެވެ.
އިންތިހާބުގައި ވޯޓުލުމުގެ ހައްޤު ލިބިގެންވާ މީހުންގެ ލިސްޓު ޗެކްކުރުމަށްފަހު އެ ލިސްޓާއި މެދު ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލާނެވެ. ވޯޓުލާ މީހުންގެ ދާއިމީ ލިސްޓު އާންމުކުރުމަށްފަހު އެ ލިސްޓަށް ބަދަލު ގެނައުމުގެ ފުރުސަތެއް ނޯންނާނެއެވެ.
މިއަހަރުގެ ރިޔާސީ އިންތިހާބުގެ ދެވަނަބުރުގައި ފުރަތަމަބުރު ވޯޓުލީތަންނުން އެހެން ތަނަކަށް ރެޖިސްޓަރ ކުރުމަށް 3 ދުވަހުގެ މުއްދަތެއް އިލެކްޝަންސް ކޮމިޝަނުން ދީފައިވާއިރު ރީ ރެޖިސްޓްރޭޝަނަށް 47000 ށް ވުރެ ގިނަ ފޯމު ހުށަހަޅާފައިވާކަމަށް އެ ކޮމިޝަނުން ބުނެއެވެ.
Advertisement
This content is created and paid for by advertisers and does not involve Voice Journalists
