ސްޕެޝަލް އިކޮނޮމިކް ޒޯން (އެސްއީޒެޑް) ގެ ނަމުގައި 2015 ވަނަ އަހަރު އިއުލާނު ކުރި މަޝްރޫއު އިދިކޮޅު ޕީޕީއެމް ޕީއެންސީގެ ވެރިކަމެއްގައި ކުރިއަށް ގެންދާނެ ކަމަށާއި، އެކަމަށްޓަކައި ހަދާފައިވާ ގާނޫނު ތަންފީޒުކުރާނެ ކަމުގައި އެ ކޯލިޝަންގެ ލީޑަރު ޑރ މުހައްމަދު މުއިއްޒު ވިދާޅުވެއްޖެއެވެ. 

މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަ ބުރުގެ ކެމްޕެއިންގައި ހއ ހދ އަދި ށ އަށް ޕީޕީއެމް ޕީއެންސީގެ ޓީމުން ކުރަމުންދާ ދަތުރުގައި މިއަދު ށ ފުނަދޫއަށް ވަޑައިގެން އެ ރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ، ކުރީގެ ރައީސް ޔާމީން އަބްދުލްގައްޔޫމްގެ ސިޔާސަތުގެ ތެރެއިން ރާއްޖެއަށް އިގްތިސާދީ ކުރިއެރުން ގެނައުމަށްޓަކައި ރައްޔިތުންގެ މަޖިލިސް މެދުވެރިކޮށް ވަރަށް މުހިއްމު ގާނޫނެއް ފާސްކޮށްފައިވާ ކަމަށެވެ.

އެގޮތުން ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން އެފަދަ ޒޯނެއް ރާއްޖޭގައި ތަރައްގީކުރުމަށް ޕީޕީއެމް ޕީއެންސީގެ މެނިފެސްޓޯގައި ހިމަނާފައިވާނެ ކަމަށް ޑރ މުއިއްޒު ވަނީ ވިދާޅުވެފައެވެ.

މީގެ އިތުރުން މުއިއްޒު ވިދާޅުވީ އެސްއީޒެޑް ގާނޫނުގެ ދަށުން ކަނޑައެޅޭ މުހިއްމު ސަރަހައްދުތަކެއްގައި ސްޕެޝަލް އިކޮނޮމިކް ޒޯންތަކެއް ގާއިމްކޮށް، އިންވެސްޓްމެންޓްތަކަށް ފުރުސަތު ހުޅުވާޅާނެ ކަމަށާއި އެފަދަ ޒޯނުތައް ގާއިމްކުރާނެ ސަރަހައްދުތައް ކަނޑައަޅާނީ "ސްޓްރެޓެޖިކް" ކޮށް ޕްލޭން ކުރުމަށްފަހުގައި ކަމަށްވެސް މުއިއްޒު ވަނީ ވިދާޅުވެފައެވެ.