ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ރައްޔިތުންގެ ބޯހިޔާވަހިކަމަށް ހިންގާ މަޝްރޫއުތަކަށް ކުރިމަތިލާއިރު އަތުގައި އޮތް ކުޑަ ބިންކޮޅު ދޫކޮށްލަން ނުޖެހޭ ގޮތަށް އުސޫލުތައް ބައްޓަންކުރައްވާނެ ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ މާލެއަށް ދިމާވެފައިވާ ބޯހިޔާވަހިކަމުގެ މައްސަލައާއި ގުޅޭގޮތުން މިރޭ މާލޭ ފަރީދީމަގު ސްޓެޓިކް ކުރިމަތީގައި ބޭއްވި ކަންމަތީ ޖަލްސާއެއްގައި ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ ބޯހިޔާވަހިކަމުގެ މައްސަލައިގެ ވާހަކަ ދައްކަވަނީ، އެކަމާއި ގުޅިފައިވާ އެތައް މައްސަލަތަކެއް ފެންނަން އޮތުމުން ކަމަށެވެ. އަދި މުޅި ރާއްޖެއަށް ވެސް ދިމާވެފައިވާ އެންމެ ބޮޑު އިޖުތިމާއީ މައްސަލަކަމަށް ވާތީ ކަމަށެެވެ.
ހަމައެކަނި މާލެއަށް ބަލާލި ނަމަވެސް ހައުސިން މައްސަލަ ޙައްލު ނުކުރެވި ޒަމާންތަކެއް އޮތުމުގެ ސަބަބުން ވަރަށް ދަތި ހާލުގައި އެތައް ބަޔަކު އުޅެމުންދާކަން ޑރ މުއިއްޒު ފާހަގަކުރެއްވި އެވެ.
އެއާއެކު އެމަނިކުފާނު ވިދާޅުވީ ސަރުކާރުން ހައުސިން މަޝްރޫއުތައް ކުރިއަށް ގެންދާއިރު، އެތައް އަހަރެއް ވަންދެން އެމީހަކު ދިރިއުޅުނު ކުޑަ ތަންކޮޅު ދޫކޮށްލަން ޖެހޭގޮތަށް ޝަރުތުކުރުމަކީ އިންސާފުވެރި ގޮތެއް ކަމަށް ގަބޫލުނުކުރައްވާ ކަމަށާއި، އެގޮތަށް އެކަން ކުރާނަމަ ހައުސިންއިން ލިބޭ ހަގީގީ ހިތްހަމަޖެހުން ލިބިގެން ނުދާނެކަމަށެވެ.
"ގޯއްޗަކަށް ފްލެޓަކަށް ލާއިރު އެބަޖެހޭ އަތުގައި އޮތް ތަންކޮޅު ދޫކޮށްލާން. އެހެން އެކަން ވާނަމަ 30 އަހަރު ފަހުން ލިބޭ ފުރުސަތުގެ އިންސާފުވެރިކަމުގެ އިހުސާސެއް ނުކުރެވޭ"
ޑރ މުހައްމަދު މުއިއްޒު
ޑރ މުއިއްޒު ވިދާޅުވީ އެމަނިކުފާނުގެ ސަރުކާރުގައި އެކަން ބަދަލުކުރައްވާނެ ކަމަށެވެ. އަދި ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި ހިޔާ ފްލެޓުތަކަށް ކުރިމަތިލުމުގެ ފުރުސަތު ހުޅުވާލި އިރުވެސް 600 އަކަފޫޓަށްވުރެ ކުޑަ ތަންކޮޅެއް އޮތް މީހެއް ނަމަ، އެ ތަންކޮޅު ދޫކޮށްލަން ނުޖެހޭ ގޮތަށް އުސޫލުގައި ބަޔާންކޮށްފައިވާނެ ކަން އެމަނިކުފާނު ފާހަގަކުރެއްވި އެވެ.
އޭގެ އިތުރުން ޑރ މުއިއްޒު ވިދާޅުވީ މި ސަރުކާރުގެ ބޯހިޔާވަހިކަމުގެ ސިޔާސަތު އޮތް ގޮތުން މިހާރު ހުޅުމާލެއިން ގޯތި ލިބިފައިވާ މާލޭ މީހުން، އެމީހުން މާލޭގައި އޮތް ބިންކޮޅު ދޫކޮށްލަން ޖެހޭ ޖެހުން ވެސް ގާނޫނީ އެހީތެރިކަމާއެކު ބަދަލުކޮށް، އެތަންތަން ދޫކޮށް ނުލާވެސް ހައުސިން ލިބޭނެ އިންތިޒާމުތައް ހަމަޖެއްސެވުމަށް މަސައްކަތްޕުޅު ކުރައްވާނެ ކަމަށެވެ.
ޑރ މުއިއްޒު ވިދާޅުވީ މާލެ ސަރަހައްދުގައި ހުރި ފަޅުތައް ހިއްކާ، ބިން އިތުރުކޮށްގެން މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯއްދަވާދެއްވާނެ ކަމަށެވެ. އަދި ރާއްޖޭގެ ހުރިހާ ރައްޔިތުންނަށް ވެސް ގެދޮރުވެރިކަން ކަށަވަރުކޮށްދެއްވާނެ ކަމުގެ ޔަގީންކަން ވެސް ދެއްވާ ކަމަށެވެ.
Advertisement
This content is created and paid for by advertisers and does not involve Voice Journalists
