ރިޔާސީ އިންތިޚާބުގެ ދެވަނަ ބުރުގައި އެއްވެސް ކޮޅަކަށް ނާރަން ދަ ޑިމޮކްރެޓްސްގެ ކައުންސިލުން ނިންމައިފި އެވެ. 

އެ ޕާޓީން މިފަދައިން ނިންމާފައިވަނީ މިރޭ ދަ ޑިމޮކްރެޓްސްގެ އިންޓަރިމް ކައުންސިލުން ބޭއްވި ބައްދަލުވުމުގައެވެ. 

އެމްޑީޕީގެ ސަރުކާރާއި ގުޅޭނީ ނިޒާމީ ވޯޓު މި މަހުގެ 28 ވަނަ ދުވަހުގެ ކުރިން ނަގަން މި މަހުގެ 20ގެ ކުރިން އެއްބަސްވާނަމަ ކަމަށާއި، ޕީޕީއެމްއާއި ގުޅޭނީ އެ ސަރުކާރުގެ ހިއްސާ އެ ޕާޓީއަށް ލިބޭނެ ކަމަށް މި މަހުގެ 20 ކުރިން އެއްބަސްވެގެން ކަމަށް ނިންމާ ދަ ޑިމޮކްރެޓްސްގެ ފަރާތުން މުހައްމަދު ޝިފާޒް (ޝިއްޕެ) ވަނީ މިރޭގެ ކައުންސިލް ބައްދަލުވުމަށް ގަރާރެއް ހުށައަޅުއްވާފަ އެވެ. 

Advertisement

ޑިމޮކްރެޓުންގެ ކައުންސިލް ބައްދަލުވުމުގައި ވާހަކަ ފުޅުދައްކަވަމުންދާ ހުރިހާ ބޭފުޅުންގެވެސް ވާހަކަފުޅަކަށްވަނީ ރައީސް އިބްރާހީމް މުހައްމަދު ސާލިހް ހުށަހަޅުއްވާފައިވާ ތާރީޚް ގަބޫލުފުޅު ނުކުރެއްވުމަށެވެ.

ގަލޮޅު އުތުރުދާއިރާގެ މެމްބަރ އީވާ ވިދާޅުވީ 28 އޮކްޓޫބަރގެ ކުރިން ނިޒާމީ ވޯޓް ނަގަންޖެހޭނެ ކަމަށެވެ. އިބްރާހިމް މުހައްމަދު ސާލިހަށް މިހާރު އިތުބާރު ނުކުރެވޭކަމަށާއި ޑިމޮކްރެޓުންގެ ޝަރުތުތައް ގަބޫލު ނުކުރެވޭނަމަ ޑިމޮކްރެޓުން މިއިންތިޚާބުގައި ވަކިކޮޅެއް ޚިޔާރުކުރަން ކޮންމެހެން ނުޖެހޭނެކަމަށް ކައުންސިލް ބައްދަލުވުމުގައި ވާހަކަދެއްކެވި ގިނަ ބޭފުޅުން ވަނީ ވިދާޅުވެފަ އެވެ.