އޭއެފްސީ ޗެންޕިްއަންސް ލީގުގެ ގުރޫޕް ޑީގައި ހޯމަ ދުވަހުގެ ރޭ އަމިއްލަ ދަނޑުގައި އުޒްބެކިސްތާނުގެ ނަވްބާހޯރް ނަމަންގަން އާއި ދެކޮޅަށް ސައުދީ ޕްރޮފެޝަނަލް ލީގުގެ އަލް ހިލާލް ކުޅުނު މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ އަލް ހިލާލް އިން މެޗު ޑޮމިނޭޓުކުރި ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް ލަނޑުހާނެ މާރަގަޅު ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ނަވްބާހޯރް ނަމަންގަން އިންނެވެ. އަދި މިމެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މިލަނޑު ދެވަނަ ހާފު ފެށިގެން 7ވަނަ މިނެޓުގައި ކާމިޔާބުކޮށްދިނީ އެޓީމުގެ ޖޯޖިޔާ ފޯވާޑް ޓޯމާ ޓަބަޓަޑްޒޭ އެވެ.

Advertisement

މިއީ އެޓީމުގެ އުޒްބެކިސްތާން މިޑްފީލްޑަރު އަބްރޯބެކް އިސްމޮއިލޯވް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އަލް ހިލާލް އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޑިފެންޑަރު އަލީ އަލް ބުލައިހީ އެވެ. މިއީ އެޓީމުގެ ބްރެޒިލްގެ ފޯވާޑް މައިކަލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިގުރޫޕްގައި މިއަދު ކުޅެވުނު ފުރަތަމަ މެޗުގައި އިންޑިޔާގެ މުމްބާއީ ސިޓީ އާއި އިރާނުގެ ނަސާޖީ މަޒަންދަރަން ވާދަކުރި މެޗު 2-0 ގެ ނަތީޖާއަކުން ކާމިޔާބުކުރީ ނަސާޖީ އެވެ.