މާލެ ސިޓީގެ ހެންވޭރު ހުޅަނގު ކައުންސިލަރ އަޙްމަދު އައިފާން އަށް ނޭނގި އޭނާ ރީ-ރަޖިސްޓަރ ކުރަން މަސައްކަތްކޮށްފިއެވެ.

މިކަން ހާމަކުރައްވައި އައިފާން ކުރެއްވި ޓްވީޓެއްގައި އޭނާ ވަނީ، ރީ ރެޖިސްޓާ ކުރަން އޭނާ ހުށަނާޅާ ކަމަށާ، އެހެން ނަމަވެސް, އޮންލައިންކޮށް އޭނާ ރީ-ރެޖިސްޓާރ ކުރަން އޯޓީޕީ ނަންބަރު މެސެޖުން އައިސްފައިވާ ކަމަށެވެ. އެގޮތުން އައިސްފައިވާ މެސެޖުގެ ފޮޓޯއެއްވެސް އައިފާންގެ ޓުވީޓުގައި ވަނީ ހިމަނުއްްވާފައެވެ. 

މިއާއެކު އައިފާން ވިދާޅުވީ، މިއީ ވަރަށް ހައްސާސް މައްސަލަ އެއް ކަމަށާ، މި މައްސަލަ އިލެކްޝަންސް ކޮމިޝަނާއި ފުލުހުންވެސް ތަހުގީގު ކުރަންޖެހޭ ކަމަށެވެ. 

އައިފާން ނޫން އެހެންވެސް ވަރަށް ގިނަ މީހުންނަށް ނޭނގި އެމީހުން ރީ ރެޖިސްޓާ ކޮށްފައިވާ މައްސަލަތައް މިހާރު އަންނަނީ ފެންމަތިވަމުންނެވެ. އެގޮތުން، މާލޭގައި ރެޖިސްޓާރ ކޮށްފައިވާ އެއްބައި މީހުން ފުވައްމުލަކު ނުވަތަ ބޭރުގެ ބައެއް ގައުމު ތަކުގައިވެސް ރީ ރެޖިސްޓާ ކޮށްދީފައިވާ ކަމަށް އެ ފަރާތްތަކުން އަންނަނީ ބުނަމުންނެވެ. މި ގޮތަށް ގިނައިން ކޮށްފައި ހުރީ އެ މީހާއަށް ވޯޓުލާން ދާންވެސް އުނދަގޫ ހިސާބުތަކަށް ކަން ފާހަގަކޮށްލަންޖެހެއެވެ. 

މި މައްސަލާގައި އިލެކްޝަންސް ކޮމިޝަނުން ބުނީ، ‏ރީ-ރަޖިސްޓްރީ ކުރާ ފޯމެއް ހުށަހަޅައިގެން ނުވަތަ އޮންލައިން ޕޯޓަލް މެދުވެރިކޮށް ނޫން ގޮތަކަށް އެއްވެސް މީހަކު ރީ-ރަޖިސްޓަރީ ކުރުމުގެ ފުރުސަތެއް ނޯންނާނެ ކަމަށެވެ. 

އަދި އެފަދަ އީސީ އަށް މައްސަލަ ހުށަހެޅުމުން ފޯމުގެ ކޮޕީ ނުވަތަ ޕޯޓަލް އިން އެދިފައިވާކަން ބަލައިދެވޭނެ ކަމަށާ، ރީ-ރަޖިސްޓްރޭޝަން ގެ މަސައްކަތް ނިމި، ލިސްޓު ޢާންމުކޮށް ޝަކުވާ އަށް ދެ ދުވަހުގެ މުއްދަތަށް ހުޅުވައިލެވޭނެ ކަމަށެވެ. އަދި ފައިނަލް ލިސްޓު އީސީގެ ވެބްސައިޓުން ފެންނާނެ ކަމަށާ، އަދި ކެންޑިޑޭޓުންނާއި، މަސްލަޙަތު އޮތް ޕާޓީތަކާއެކު ލިސްޓު ޙިއްސާ ކުރެވޭނެ ކަމަށްވެސް ބުނެފައިވެއެވެ.

މިއާއެކު އީސީން ބުނީ، އެ މައްސަލާގައި ގޯހުން ކަމެއް ހިނގާފައިވާނަމަ، އެކަމެއް އީސީން އިސްލާޙް ކޮށްދޭނެ ކަމަށެވެ.