މިއަދުގެ ނިޔަލަށް ރިޔާސީ އިންތިޚާބުގައި ވޯޓުލުމަށް ރީ ރެޖިސްޓޭޝަނަށް އެދި ހުށަހެޅި ހުރިހާ ފޯމެއްގެ މަސައްކަތް ނިމޭނެ ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ޙަބީބް ވިދާޅުވެއްޖެއެވެ.
ޙަބީބް ވިދާޅުވެފައިވަނީ ސެޕްޓެމްބަރު 9 ވަނަ ދުވަހު ބޭއްވި، ރިޔާސީ އިންތިޚާބުގެ ފުރަތަމަ ބުރުގައި 42867 ފޯމު ހުށަހެޅިއިރު، ދެވަނަބުރުގައި ގާތްގަނޑަކަށް 47 ހާސް ފޯމު ހުށަހެޅުމުން، ދެބުރުގެ ފޯމުތަކުގެ ޖުމްލަ މިވަނީ ގާތްގަނޑަކަށް 90 ހާހަށް އަރައިފައި ކަމަށެވެ.
ދެވަނަބުރުގައި ހުށަހެޅި 47 ހާސް ފޯމުގެ ތެރެއިން، ރޭގެ 8 ޖެހުމާ ހަމަޔަށް ޕެންޑިންގ ގައި ހުރީ ގާތްގަނޑަށް 16 ހާސް ފޯމު ކަމަށާއި، މަސައްކަތް ކުރެވެމުންދަނީ މިއަދުގެ ނިޔަލަށް، މިހާރު ބާކީހުރި 16 ހާސް ފޯމު ނިންމުމަށް ކަމަށް ޙަބީބް ވިދާޅުވިއެވެ.
މީގެ އިތުރުން ޙަބީބް ވިދާޅުވީ ރިޔާސީ އިންތިހާބު 2018 ގައި، 103047 މީހުން ރީ-ރަޖިސްޓަރީ ކުރަން ހުށަހެޅި ކަމަށެވެ.
އޭގެ ފަސް ވަރަކަށް މަސްފަހުން ބޭއްވި، ރައްޔިތުންގެ މަޖިލީހުގެ އިންތިހާބު 2019 ގައި، 20848 މީހުން އަދި ލޯކަލް ކައުންސިލްތަކުގެ އިންތިހާބު 2020 ގައި، 29672 މީހުންވަނީ ރީ-ރަޖިސްޓަރީ ކޮށްފައި ކަމަށެވެ.
Advertisement
This content is created and paid for by advertisers and does not involve Voice Journalists
