އިންތިޚާބުގެ ދެވަނަ ބުރުގައި ވޯޓުލާން ރީރެޖިސްޓަރ ކުރި މީހުންގެ ޢަދަދު އިތުރުވެފައިވަނީ ވޯޓުލާން ނުނިކުމެ ތިބި މީހުންނަށް ވިސްނައި ދިނުމުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ރޭ މާލޭގައި ބޭއްވި މާފަންނު ކަންމަތީ ޖަލްސާގައި ވާހަކަ ދައްކަވަމުންނެވެ.
ރައީސް ޞާލިޙް ވިދާޅުވީ 30 ސެޕްޓެމްބަރުގައި އޮންނަ ވޯޓަށް ނުކުންނަވަން ވާނީ ކުރީގެ މާޒީގައި ކަންކަން ހިނގައިދިޔަ ގޮތައް ވިސްނަމުން ކަމަށެވެ.
"އާދެ ނިމިދިޔަ 9 ސެޕްޓެމްބަރުގެ ވޯޓުން އަޅުގަނދުމެންނަށް ފެންނަ ހަޤީޤަތްތަކެއް އެބަހުރި، މިހާތަނަށް ރާއްޖޭގެ އިންތިޚާބެއްގައި އެންމެ މަދުން ވޯޓުލީ އިންތިޚާބު މިއީ، ކީއްތޯމިވީ، އަޅުގަނދު ކުރިންވެސް ދެންނެވިފަދައިން، ކީއްވެގެންތޯ، އޭ ދަށް ޕަސެންޓޭޖެއް ވޯޓުލީ، އަޅުގަނޑުމެންގެ މިއަދުގެވެސް އަމާޒަކަށް ވާންވީ، އެއްކަމަކީ މި ޕަސެންޓޭޖް މަތި ކުރުން، ވޯޓްނުލާ މީހުން ހޯދައި އެމީހުންނަށް ވިސްނައިދީ ވޯޓު ފޮއްޓާއި ހިސާބަށް ގެންދިޔުން، އަޅުގަނޑު ހިތުން މިއަދު އެމްޑީޕީ ވަނީ އެކަމަށް ތައްޔާރުވެފަ" ރައީސް ޞާލިޙް ވިދާޅުވިއެވެ.
ރައީސް އިތުރަށް ވިދާޅުވީ ރީ ރެޖިސްޓޭޝަންގައި 47 ހާސްމީހުން ރަޖިސްޓްރީ ކުރުމުން އޭގެ ކަންބޮޑުވުންތައް އިދިކޮޅުން އެފާޅުކުރަނީ އެހެންވެ ކަމަށެވެ.
ރައީސް ޞާލިޙް ވިދާޅުވީ މިކުރާ މަސައްކަތުން މިކަން ކާމިޔާބު ކުރެވޭނެ ކަން ޔަޤީން ވާ ކަމަށާއި، އެމްޑީޕީ ކޯލިޝަނުން ހަމަޖެހިގެން މިތިބީ އެހެންވެކަމަށެވެ.
Advertisement
This content is created and paid for by advertisers and does not involve Voice Journalists
