އޭއެފްސީ ޗެންޕިއަންސް ލީގުގެ ގްރޫޕް އީގައި އަންގާރަދުވަހުގެ ރޭ ރަށުން ބޭރުގައި އީރާންގެ ޗެންޕިއަން ޕަރސެޕޮލިސް އާއި ދެކޮޅަށް ކުޅުނު މެޗު 2-0 ގެ ނަތީޖާއަކުން އަލް ނަސްރު ކާމިޔާބުކޮށްފިއެވެ.

ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ލަނޑުޖަހާނެ އެންމެ ހުސް ފުރުސަތެއް ލިބުނީ އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ އަށެވެ.

ފުރަތަަމަ ހާފުގެ 19 ވަނަ މިނެޓުގައި ޕަރސެޕޮލިސް ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ރޮނާލްޑޯ ބޮލުން ފޮނުވާލި ބާރު ހަމަލާ އެޓީމުގެ ގޯލްކީޕަރު އަލީރެޒާ ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފު ފެށިގެން ޕަރސެޕޮލިސް އިން ރަގަޅަށް ކުޅެމުން އަންނަނިކޮށް މެޗުގެ އޮއިވަރު ބަދަލުވީ އެޓީމުގެ މިޑްފިލްޑަރު މިލާދު ސަރްލަކް ކުރި ފައުލަކާއި ގުޅިގެން ފަހުހާފުގެ 52 ވަނަ މިނެޓުގައި ރެފްރީ އޭނާއަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މިމެޗުގައި އަލް ނަސްރުން ލީޑު ހޯދި ލަނޑު ދެވަނަ ހާފުގެ 62 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އަބްދުލްރަހްމާން ޤަރީބު އެވެ. މިއީ އެޓީމުގެ ކްރޮއޭޝިޔާ މިޑްފީލްޑަރު މާސެލޯ ބްރޮޒޮވިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ 10 މިނެޓުފަހުން އެޓީމުގެ ލީޑު ފުޅާކޮށްދިނީ ޑިފެންޑަރު މުހައްމަދު ގާސިމް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.