ޔުއެފާ ޗެމްޕިއަންސްލީގުގެ ގްރޫޕް އެޗްގައި މިރޭ ބެލްޖިއަމްގެ އެންޓްވާޕް އާއި ދެކޮޅަށް ކުޅުނު މެޗު ފަސޭހަކަމާއި އެކު 5-0 ގެ ނަތީޖާއަކުން ބާސެލޯނާ އިން ކާމިޔާބުކޮށްފި އެވެ.

މެޗުގެ ފުރަތަަމަ ހާފުގައި ބާސެލޯނާ އިން ތިން ލަނޑުގެ ލީޑެއް ހޯދިއިރު، އެޚީމުގެ ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ ޕޯޗުގަލްގެ ފޯވާޑް ޖޮއާއު ފެލިކްސް އެވެ. މިއީ އެޓީމުގެ ޖަރުމަނު މިޑްފީލްޑަރު ގުންޑޮގާން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބާސެލޯނާގެ ދެވަނަ ލަނޑު ފުރަތަމަ ހާފުގެ 19 ވަނަ މިނެޓުގައި ޖޮއާއު ފެލިކްސް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ޕޮލެންޑްގެ ފޯވާޑް ރޮބަޓް ލެވަންޑޯވްސްކީއެވެ. މިއީ މި މުބާރާތުގައި އޭނާ ކާމިޔާބުކުރި 100 ވަނަ ލަނޑެވެ. މިއާއެކު ލެވަންޑޯވްސްކީ ވެގެން ގޮސްފައިވަނީ ޗެންޕިްއަންސް ލީގުގެ ތާރީޚްގައި 100 ލަނޑު ކާމިޔާބުކުރި ތިންވަނަ ކުޅުންތެރިޔާއަށެވެ. 

މިމެޗުގައި ބާސެލޯނާ އިން ކާމިޔާބުކުރި ތިންވަނަ ލަނޑަކީ އެންޓްވާޕްގެ މިޑްފީލްޑަރު ޖެލް ބާޓްލީ އަތުން ބައިކޮޅަށް ވަން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބާސެލޯނާ އިން އިތުރު ދެ ލަނޑު ކާމިޔާބުކުރިއިރު އެޓީމުގެ ހަތަރުވަނަ ލަނޑު ފަހުހާފުގެ 54 ވަނަ މިނެޓުގައި ލެވަންޑޯވްސްކީ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ޒުވާން މިޑްފިލްޑަރު ގަވީ އެވެ. އަދި އެޓީމުގެ ފަސްވަނަ ލަނޑު 66 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ޖޮއާއު ފެލިކްސް އެވެ. މިއީ އެޓީމުގެ ބްރެޒިލް ފޯވާޑް ރަފީނިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ. އަދި މިގުރޫޕްގައި މިރޭ ޕޯޗުގަލްގެ ޕޯޓޯ އާއި ޔުކުރެއިންގެ ޝަކްތާ ޑޮނެޓްސްކް ވާދަކުރި މެޗު 3-1 ގެ ނަތީޖާއަކުން ކާމިޔާބުކުރީ ޕޯޓޯއެވެ.