ސިއްހީ ދާއިރާގައި މަސައްކަތް ކުރާ މީހުންގެ މުސާރަ ސަރުކާރުން ބޮޑުކުރި އިރު، އޭގެތެރޭގައި ހިމެނޭ ސޯޝަލް ވޯކަރުންގެ ތެރެއިން ވަރަށް ގިނަ މީހުންގެ މުސާރަ ވީ ކުޑަ ކަން ހާމަވެއްޖެއެވެ.
މެއި 1 ވަނަ ދުވަހުން ފެށިގެން، ސައިކޮލޮޖިސްޓުންނާއި، ކައުންސިލަރުންނާއި، ސޯޝަލް ވޯކަރުންނާއި، ޝޯސަލް ސަރވިސް ވޯކަރުން ހިމެނޭ ގޮތަށް، ސޯޝަލް ސަރވިސް ދާއިރާގައި މަސައްކަތްކުރާ މީހުންގެ މުސާރަ ބޮޑު ކޮށް، ބޮޑު ކުރި މުސާރަތައް ސަރުކާރުން ވަނީ އިއުލާން ކޮށްފައެވެ.
އެގޮތުން މުސާރަ ބޮޑުކޮށް ސަރުކާރުން އާއްމު ކުރި ޝީޓުގައި ވާގޮތުން ސޯޝަލް ވޯކަރަކަށް މީގެ ކުރިން އިތުރު ގަޑީގެ އެލަވަންސާއެކު ލިބެމުން އައީ އެވްރެޖްކޮށް މަހަކު 12،944 ރުފިޔާއެވެ. ނަމަވެސް "ބޮޑު" ކުރެވުނު މުސާރަ އާއެކު، އިތުރު ގަޑީގެ އެލަވަންސާ ނުލައި އެވްރެޖްކޮށް މަހަކު 21،585 ރުފިޔާ ލިބޭނެ ކަމަށް ސަރުކާރުން ބުނެފައިވެއެވެ.
ނަމަވެސް، އެ ބޮޑު މުސާރަ ލިބޭނެ މުވައްޒަފުންގެ ކެޓަގަރީގައި ގިނައިން ހިމެނެނީ މާލޭގައި މަސައްކަތް ކުރާ ފަރާތްތަކެވެ. އެގޮތުން، ރާއްޖޭގައި މިހާރު މަސައްކަތް ކުރަމުންދާ ސޯޝަލް ވޯކަރުންގެ ތެރެއިން ބޮޑު މުސާރަ ލިބޭ ރޭންކު ކަމުގައިވާ އެމްއެސް 2 އަދި 1 އަށް ވަންނަ ތިބީ ވަރަށް މަދު މުވައްޒަފުންނެވެ. ސޯޝަލް ވޯކަރުންގެ ތެރެއިން ގިނަ މީހުން ވަންނަނީ ޖީއެސް 4 ގެ ރޭންކަށެވެ. އަދި ބޮޑު ކުރެވުނު މުސާރައާއެކު އެ ރޭންކުގައި ތިބި ހުރިހާ ސޯޝަލް ވޯކަރުންގެ މުސާރަ ވަރަށް ބޮޑު ތަނުން ދަށްވެފައިވާ ކަމަށް އެފަރާތްތަކުން އަންނަނީ ބުނަމުންނެވެ.
އެގޮތުން، އެކަމާއި ގުޅޭގޮތުން، "ވޮއިސް"އަށް މައުލޫމާތު ދެއްވި ސޯޝަލް ވޯކަރެއް ވިދާޅުވީ، އެމްއެސް 2 އަދި 1 އާއި ޖީއެސް 4 އާއި ދެމެދު މުސާރައިގެ ފަރަގު 6000 ރުފިޔާއާއި ގާތް ކުރާ ކަމަށެވެ. އެހެންނަމަވެސް، ކުރާ މަސައްކަތުގެ ގޮތުން ބަލާނަމަ، ތިން ރޭންކުގެ މުވައްޒަފުންވެސް ކުރަމުންދަނީ އެއް މަސައްކަތެއް ކަން އޭނާ ފާހަގަކުރެއްވިއެވެ.
އަދި މީގެ އިތުރުން، ބޮޑު ކުރި މުސާރައާއި އެކު ކުރިން، ވަޒީފާއަށް ނުކުންނަ ކޮންމެ ދުވަހަކަށް ދިން 100ރުފިޔާގެ ރިސްކު އެލަވަންސް އާއި، ލިބެމުންއައި އަންލިމިޓެޑް އޯޓީވެސް ކަނޑާލާފައިވާ ކަމަށެވެ. އެގޮތުން މީގެ ކުރިން އިތުރު ގަޑީގައި މަސައްކަތް ކުރުމުން ގާތްގަނޑަކަށް 3000 ރުފިޔާ، އަދި ރިސްކުގެ ގޮތުގައި މަހަކަށް 2000 އަށްވުރެ ގިނައިން ލިބެމުން އައި ނަމަވެސް މިހާރު އެ މުސާރައެއް ނުލިބެއެވެ.
އަޅުގަނޑުމެންނަށް ގާތްގަނޑަކަށް 4000-5000 ދެމެދުގެ ގެއްލުމެއް މިވީ މުސާރަ ބޮޑު ވުމުން. މިހާރު އޯޓީ އަށްވެސް ލިބެނީ %10. އެއީ ގާތްގަނޑަކަށް 800 އެއްހާ ރުފިޔާ. އެކަމަކު އެއަށްވުރެ ގިނައިން މަސައްކަތް ނުކޮށްވެސް ވާކަށް ނޯވޭ. ދަންވަރުވެސް ކޭސް އެއް އައިސްދާނެ. ކޮންމެ އަތޮޅެއްގައި ހިމެނޭ ރަށްތައް ބަލަހަށްޓަމުން، އެކި މުވައްސަސާތަކަށް ރިޕޯޓްތައް ފޯރުކޮށްދެމުން މިދަނީ. އެކަމަކު މުސާރައިގެ އެ 10 ޕަސެންޓް ހަމަވީ އޯޓީ ނުލިބޭ. އެކަމަކު މަސައްކަތް ނުކޮށް ވާކަށްވެސް ނޯވޭ. ހޮނިހިރު ދުވަހުވެސް އެޓެންޑެސް އެލަވެންސް ގެ އެ 72 ރުފިޔާ މި ލިބެނީ 8 ގަޑިއިރު ހެދީމާ. އެހެން ދުވަސް ދުވަހުވެސް 8 ގަޑިއިރު މަސައްކަތް ނުކޮށް އެޓެންޑެންސް އެލަވަންސް އެއް ނުލިބޭ. ހުކުރު ދުވަހުވެސް އޯޓީ ލިބެނީ 4 ގަޑިއިރަށްވުރެ ގިނަ އިރު މަސައްކަތް ކުރީމާ. އެހެން ދުވަސް ދުވަހު 8 ގަޑިއިރަށްވުރެ ގިނައިން ކުރީމާ.
ކަންމިހެން ހުރުމުން، ކުރިން 16,000 އަށްވުރެ ގިނައިން ލިބެމުންއައި މުސާރަ، މިހާރު 12,000 އާ 13,000އާ ދެމެދަށް ކުޑަވެފައިވާ ކަމަށް އޭނާ ވިދާޅުވި އެވެ. އަދި ރޭންކު މަތިވުމުން ބޮޑު މުސާރަ ލިބުނު ކަމުގައި ވިޔަސް، އެހެން ވާން އޮތީ ކިޔަވައިވެން ކަމަށާ، ނަމަވެސް ކިޔަވަންވެސް މާލެ ދިޔުމާ އެނޫންވެސް އެތައް ޚަރަދެއް ކުރަންޖެހޭ ކަން އޭނާ ފާހަގަކުރެއްވިއެވެ. އެހެންކަމުން, ތަކެތީގެ އަގުތައް މިހާ ބޮޑު އިރު، އެ ލިބޭ ކުޑަ މުސާރައިން އެހުރިހާ ކަމެއް ކުރަން ވަރަށް ދަތިވާ ކަމަށްވެސް އޭނާ ވިދާޅުވި އެވެ.
އެއް މަސްއޫލިއްޔަތުތަކެއް އަދާ ކުރާ ދެ ރޭންކެއްގެ ދެމެދުގައި މިހާބޮޑު ފަރަގެއް އޮތުމުން، އެކަން ސަރުކާރުގެ ކަމާބެހޭ މުއައްސަސާތަކަށް އަންގައިގެން މައްސަލަ އަށް ހައްލެއް ލިބޭތޯ މަސައްކަތްކުރަމުންދާތާ 5 މަހަށްވުރެ ގިނަ ދުވަސް މިހާރު ވެފައިވާކަން އޭނާ ފާހަގަކުރެއްވިއެވެ. އެހެންނަމަވެސް، އަދި އެ މައްސަލަ ހައްލުވެފައި ނުވާކަމަށް ވިދާޅުވިއެެވެ.
ވުމާއެކު، ބޮޑު ކުރި މުސާރައާއެކު، އެފަރާތްތަކުގެ މުސާރަވީ ކުޑަ ކަމަށާ، އެއާއެކު އިތުރު އެތައް ތަކުލީފުތަކެއް އުފުލަންޖެހިފައިވާ ކަމަށް އޭނާ ވިދާޅުވި އެވެ. އަދި އެއް މަސައްކަތެއް ކުރާ ބައެއްގެ މެދުގައި އޮތް މުސާރައިގެ ބޮޑު ފަރަގަކީ ވަރަށް ބޮޑު ބޭއިންސާފެއް ކަމަށް އެ ސޯޝަލް ވޯކަރުން އަންނަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
