ރިޔާސީ އިންތިޚާބުގެ ދެވަނަ ބުރުގެ "ޓަރންއައުޓް" މަތިވާނެ ކަމަށާއި ރައީސް އިބްރާހިމް މުޙައްމަދު ޞާލިޙް ދެވަނަ ބުރުން އިންތިޚާބު ކާމިޔާބު ކުރައްވާނެ ކަމަށް ރައީސް އޮފީހުގެ ޗީފް އޮފް ސްޓާފް ޢަލީ ޒާހިރު ވިދާޅުވެއްޖެއެވެ.

ޢަލީ ޒާހިރު ކުރައްވާފައިވާ ޓްވީޓެއްގައި ވިދާޅުވެފައިވަނީ އަނިޔާވެރިކަން އިޔާދަވާން ދިވެހިން ފުރުސަތު ނުދޭނެ ކަމަށާއި، އެކަންކަން ހަނދާން ނެތޭހާ ދުވަސް އަދި ނުވާކަމަށެވެ.

"މިފަހަރު ޓަރންއައުޓް މަތިވާނެ، އިރާދަކުރެއްވިއްޔާ ކެންޑިޑޭޓް ނަންބަރު 3 ފަސޭހަ ކަމާއިއެކު  މިބުރު ކާމިޔާބު ކުރައްވާނެ" ޢަލީ ޒާހިރު ވިދާޅުވެފައިވެއެވެ.

Advertisement

އިންތިޚާބުގެ ފުރަތަމަ ބުރުގައި ރައީސް ޞާލިޙަށް 85 ހާހެއްހާ ވޯޓު ލިބިވަޑައިގެންނެވިއިރު އިދިކޮޅު ކެންޑިޑޭޓް ޑރ މުޙައްމަދު މުޢިއްޒަށް އެއްލައްކައިން މަތިން ވޯޓު ވަނީ ލިބިވަޑައިގެންފައެވެ.

އިންތިޚާބުގެ ދެވަނަ ބުރު މިމަހުގެ 30ގައި އޮންނައިރު ފުރަތަމަ ބުރުގައި ވާދަކުރި އެއްވެސް އެހެން ކެނޑިޑޭޓަކު ރައީސް ޞާލިޙަށް ތާއީދު ކުރައްވައިފައެއް ނުވެއެވެ. އެމްއެންޕީ އިން ޑރ މުޢިއްޒަށް ތާއީދު ކުރި އިރު ޖޭޕީ، ޑިމޮކްރެޓްސް އަދި އަމިއްލަ ކެންޑިޑޭޓުން ކަމަށްވާ އަހްމަދު ފާރިސް މައުމޫން އަދި ޙަސަން ޒަމީލް ނިންމަވާފައިވަނީ އެއްވެސް ކެންޑިޑޭޓަކަށް ތާއީދު ނުކުރެއްވުމަށެވެ.