މިވަގުތު ނިޒާމީ ވޯޓެއްގެ ވާހަކަ ދެއްކުމަކީ މުހިންމުކަމެއް ކަމަށް ދެކިވަޑައިނުގަންނަވާ ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ ޅޮހީގައި ބޭއްވި ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އެގޮތުން އަބްދުއްރަހީމް ވިދާޅުވީ ދިވެހިރާއްޖޭގައި އޮންނަން ފެންނަ ވެރިކަމުގެ ނިޒާމަކީ ރިޔާސީ ނިޒާމުކަން ޤާނޫނު އަސާސީގައި އޮތީ ބަޔާންކޮށްފައި ކަމަށެވެ. އަދި އެފަދައިން ޤާނޫނުގައި ބަޔާންކޮށްފައި ވަނީ ރައްޔިތުންނަށް އެގޮތަށް ފެނިގެން، އެގޮތަށް ގަބޫލުކުރެވޭތީ ކަމަށާއި، އެއީ ރައްޔިތުންގެ ނިންމުން ކަމަށް އަބްދުއްރަހީމް ވިދާޅުވި އެވެ. 

އެކަން ފާހަގަކުރައްވާ އަބްދުއްރަހީމް ވިދާޅުވީ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމަކީ އަބަދުވެސް ޤާނޫނު އަސާސީއާއި، ގަވައިދުތަކާއި އެއްގޮތަށް އަމަލުކުރައްވާ ބޭފުޅެއް ކަމަށެވެ. އަދި އެމަނިކުފާނަކީ ރައްޔިތުންގެ ނިންމެވުމާއި އެއްގޮތަށް ކަންކަން ކުރިއަށް ގެންދަވާ ލީޑަރެއް ކަމަށާއި، ޕީޕީއެމް-ޕީއެންސީގެ ސިޔާސަތަކީ ވެސް ރައްޔިތުން އެދޭގޮތަށް ކަންކަން ކުރުމުގެ ސިޔާސަތުކަމަށް އަބްދުއްރަހީމް ވިދާޅުވި އެވެ. 

އެއާއެކު އަބްދުއްރަހީމް ވިދާޅުވީ ރާއްޖޭގައި އޮންނަން ފެންނަ ވެރިކަމުގެ ނިޒާމަކީ ރިޔާސީ ނިޒާމުކަމަށް ރައްޔިތުން ކަނޑައަޅާފައި އޮއްވާ، އެ ނޫންގޮތަކަށް ނިޒާމު ބަދަލުކުރުމުގެ ވާހަކަ މި ދަނޑިވަޅުގައި އަމުދުން ވެސް ދައްކަވަން ބޭނުންނުވާ ކަމަށެވެ. އަދި އިދިކޮޅުން ތާއީކުރަނީ ވެސް ރިޔާސީ ނިޒާމަށްކަން އޭނާ ފާހަގަކުރެއްވި އެވެ. 

އަބްދުއްރަހީމް ވިދާޅުވީ ޕީޕިއެމް-ޕީއެންސީ ކޯލިޝަންގެ އަމާޒަކީ އިންތިޚާބުގެ ދެވަނަ ބުރު ކާމިޔާބުކުރުން ކަމަށެވެ.

އެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށާއި، 30 ސެޕްޓެމްބަރުގައި ނަގާ ވޯޓާއެކު މި ސަރުކާރު ބަދަލުވެގެންދާނެކަމަށް އަބްދުއްރަހީމް ވިދާޅުވި އެވެ. އެކަން ކާމިޔާބުކުރުމަށް ކުރިއަށް އޮތް ދުވަސްތަކުގައި ރައްޔިތުން ވެސް ވަރަށް ބުރަކޮށް މަސައްކަތްކޮށްދެއްވުމަށް އަބްދުއްރަހީމް ވަނީ އެދިވަޑައިގެންފަ އެވެ.