މި ސަރުކާރުން ކުޑަރަށެއް ބޮޑުރަށެއް ތަފާތުކުރުމެއް ނެތި ރާއްޖޭގެ ސިއްޙީ ނިޒާމަށް އިހުމާލުވެފައިވާކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު ރ އަތޮޅަށް ކުރައްވާ ކެމްޕޭނު ދަތުރުފުޅުގައި، އެ އަތޮޅު ވާދޫއަށް ވަޑައިގެން، އެ ރަށުގައި ބޭއްވި ކެމްޕޭނު ޖަލްސާއެއްގައި ވާހަކަދައްކަވަމުން ވިދާޅުވީ ރާއްޖޭގެ އެކި ކަންކޮޅުތަކަށް ކުރެވުނު ކެމްޕޭނު ދަތުރުފުޅުގައި ސިއްހީ ނިޒާމަށް ވަރަށް ބޮޑަށް އިހުމާލުވެފައިވާކަން ފާހަގަކުރެވިފައިވާ ކަމަށެވެ. 

ރަށްރަށުގައި ގާއިމްކުރެވިފައި ހުރި ސިއްހީ ވަސީލަތްތައް ވެސް ނުބެލެހެއްޓި، އަދި ރަށްރަށުގައި އެކަށީގެންވާ ސިއްހީ ޚިދުމަތްތަކެއް ވެސް ގާއިމްނުކުރެވި މުޅި ސިއްހީ ނިޒާމަށް މި ސަރުކާރުން ވަރަށް ބޮޑަށް އިހުމާލުވެފައިވާކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ވެރިކަމަށް ވަޑައިގަންނަނީ ރާއްޖޭގައި ހީނަރުވެފައި އޮތް ސިއްޙީ ނިޒާމު އަލުން އަނބުރާ ކޮޅަށް ޖަހާ ރާއްޖޭގެ ކޮންމެ ތަނެއްގައި ހުންނަ މީހަކަށް ވެސް ރަނގަޅު ފެންވަރުގެ ސިއްޙީ ޚިދުމަތް ލިބޭނެ އިންތިޒާމުތައް ހަމަޖައްސަވާދެއްވުމަށް ކަމަށެވެ. 

އެގޮތުން ވާދޫގެ ރައްޔިތުންނަށް ބޭނުންވާ ސިއްހީ ފަރުވާ ރަށުގައި ތިބެގެން ފަސޭހަކަމާއެކު ލިބޭނެ އިންތިޒާމުތައް ހަމަޖެއްސުމަށް ހެލްތު ސެންޓަރުގައި ވަސީލަތްތައް ގާއިމްކުރައްވާ ޚިދުމަތްތައް ފުޅާ ކުރައްވާނެކަމަށް ޑރ މުއިއްޒު ވިދާޅުވި އެވެ. އަދި ރާއްޖޭގެ އެކި ކަންކޮޅުތަކުގައި ވެސް ސިއްހީ ޚިދުމަތް ފޯރުކޯށްދިނުމަށް އެކަށީގެންވާ ވަސީލަތްތައް ގާއިމްކުރައްވާނެކަމުގެ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ.