ވެރިކަމަކީ ލިބޭ ބޮޑު އިއްޒަތެއްކަމަށް ޤަބޫލުފުޅު ނުކުރައްވާ ކަމަށާއި، ބަދަލުގައި ދެކިވަޑައިގަންނަވަނީ އެއީ ރައްޔިތުން ހަވާލުކުރާ އަމާނާތެއްގެ ގޮތުގައި ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ ރ ހުޅުދުއްފާރުގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.
އެ ޖަލްސާގައި ރައްޔިތުންނާއި މުޚާތަބުކުރައްވާ ވާހަކަދައްކަވަމުން ޑރ މުއިއްޒު ވަނީ ސަރުކާރު ޖަވާބުދާރީ ކުރުވުމުގައި ރައްޔިތުންގެ ޒިންމާއަށް އަލިއަޅުވާލައްވާފަ އެވެ. އަދި އެކަން އަބަދުވެސް ކުރެއްވުމަށް ބާރުއަޅުއްވާކަމަށް ވިދާޅުވެފަ އެވެ.
އެގޮތުން އެމަނިކުފާނު ވިދާޅުވީ ޤާނޫނު އަސާސީގައި ބަޔާންކޮށްފައިވާ ރައްޔިތުންގެ ހައްގުތައް ކަށަވަރުކޮށްދޭނެ ސަރުކާރެއް ރާއްޖޭގައި އުފެދެން ޖެހޭކަމަށެވެ. ސަރުކާރުގެ ނިޒާމުގެ ތެރެއިން ކޮންމެ ރައްޔިތަކަށް ވެސް އަސާސީ ހައްގުތައް ކަށަވަރުވާން ޖެހޭ ކަމަށާއި، އެފަދަ ނިޒާމެއް ރާއްޖޭގައި ގާއިމްކުރެވެން ޖެހޭކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ ވެރިކަމަކީ ފަހަރެއްގައި ވެސް ބޮޑު އިއްޒަތެއްކަމަށް އެމަނިކުފާނު ދެކިވަޑައިނުގަންނަވާ ކަމަށެވެ. އަދި އެ މަޤާމަށް އައުމަށް މަސައްކަތްޕުޅު ކުރައްވަމުން ދަނީ ވެރިކަމަކީ ރައްޔިތުން ހަވާލުކުރާ އަމާނާތެއްގެ ގޮތުގައި ދެކިވަޑައިގެން ރައްޔިތުންނަށް ޚިދުމަތްކުރެއްވުމަށް ކަމަށް ޑރ މުއިއްޒު ވިދާޅުވި އެވެ.
ޑރ މުއިއްޒުގެ އިސްތިގުބާލުގައި ތިބި ފަރާތްތަކާއި ސަލާންކުރެވުމުގެ ތެރެއިން
"އަޅުގަނޑު މިއަންނަނީ ތެދުވެރިކަމާއި އަމާނާތްތެރިކަމާއި އެކު ރައްޔިތުންނަށް މިކަން ކޮށްދޭން. މި އަމާނާތް އަދާކޮށް މި ޒިންމާ އުފުލައި، ތެދުވެރިކަމާއެކު ރައްޔިތުންނަށް ޚިދުމަތްކޮށްދެވޭނެކަމުގެ ޔަގީންކަން އޮތީމާ އަޅުގަނޑު މި މަޤާމަށް އަންނަން މަސައްކަތް މިކުރަނީ"
ޕީޕީއެމް-ޕީއެންސީގެ ރިޔާސީ ކެންޑިޑޭޓު ޑރ މުހައްމަދު މުއިއްޒު
ޑރ މުއިއްޒު ވިދާޅުވީ އެމަނިކުފާނު ވެރިކަމަށް ކުރިމަތިލެއްވީ ރައްޔިތުންނަށް ޚިދުމަތްކުރުމަށް ލިބޭ ފުރުސަތުގެ ބޭނުން އަމާނާތްތެރިކަމާއެކު ހިފައި، ރައްޔިތުން ބޭނުންވާ ނަތީޖާ ނެރެދެވޭނެކަން ޔަގީންކުރެވޭތީ ކަމަށެވެ.
އެގޮތުން ރައްޔިތުން އެ މަސްއޫލިއްޔަތު ހަވާލުކުރައްވައިފި ސިޔާސީ ކުލައަށް ބެއްލެވުމެއް ނެތި، އަދި ރައްޔިތުންގެ މެދުގައި އެއްވެސް ތަފާތުކުރުމެއް ނެތި ޚިދުމަތްތައް ފޯރުކޮށްދެއްވާނެ ކަމަށާއި، ރައްޔިތުންގެ މެދުގައި ހަމަހަމަކަން ޤާއިމްކުރައްވާނެ ކަމަށް ޑރ މުއިއްޒު ވިދާޅުވި އެވެ.
އޭގެ އިތުރުން ޑރ މުއިއްޒު ވަނީ އިންސާފާއި ހަމަހަމަކަން ޤާއިމްވެފައި އޮންނަ ވެރިކަމެއް ރައްޔިތުން އެދޭނަމަ އެމަނިކުފާނަށް ރިޔާސީ އިންތިޚާބުގެ ދެވަނަ ބުރުގައި ވޯޓުދެއްވާ އިންތިޚާބުކޮށްދެއްވުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
