ޔުއެފާ ޗެމްޕިއަންސްލީގުގެ ގްރޫޕް އޭގައި ރޭ އަމިއްލަ ދަނޑުގައި މެންޗެސްޓާ ޔުނައިޓެޑާއި ދެކޮޅަށް ކުޅުނު މެޗު 4-3 ގެ ނަތީޖާއަކުން ބަޔާން މިއުނިކް އިން ކާމިޔާބުކޮށްފި އެވެ.

ލީގުގައި އެންމެ ފަހުން ކުޅުނު ދެ މެޗުން ވެސް ބަލިވެފައިވާ ޔުނައިޓް އެންމެ ފަހުން ކުޅުނު ފަސް މެޗުގެ ތެރެއިިން ހަތަރު މެޗުން ބަލިވެފައިވާއިރު، މޮޅުވެފައި ވަނީ އެންމެ މެޗަކުންނެވެ.

ރޭގެ މެޗުގެ ފުރަތަަމަ ހާފުގައި ބަޔާން މިއުނިކް ދެ ލަނޑުގެ ލީޑެއް ނެގިއިރު، އެޓީމުގެ ފުރަތަމަ ލަނޑު ފުރަތަމަ ހާފުގެ 28 ވަނަ މިނެޓުގައި ކާމިޔާބުކޮށްދިނީ ސާނޭ އެވެ. މިއީ އެޓީމުގެ އިގިރޭސި ފޯވާޑް ހެރީ ކޭން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ހަތަރު މިނެޓު ފަހުން އެޓީމުގެ ލީޑު ފުޅާކޮށްދިނީ ސާޖް ގްނެބްރީ އެވެ. މިއީ އެޓީމުގެ ޒުވާން މިޑްފިލްޑަރު ޖަމާލު މުސިއާލާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ބަޔާން މިއުނިކް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ހަވަނަ މިނެޓުގައި ޔުނައިޓުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ ޑެންމާކްގެ ޒުވާން ފޯވާޑް ރަސްމުސް ހޮޖްލަންޑް އެވެ. ނަމަވެސް އޭގެ ހަތަރު މިނެޓު ފަހުން ބަޔާން މިއުނިކަށް ލިބުނު ޕެނަލްޓީއެއްގައި ހެރީ ކޭން ވަނީ ލަނޑެއް ކާމިޔާބުކޮށް އެޓީމަށް އަނެއްކާވެސް ދެ ލަނޑުގެ ލީޑެއް ހޯދައިދީފައެވެ.

މިމެޗުގައި ޔުނައިޓެޑްގެ ދެވަނަ ލަނޑު ފަހުހާފުގެ 88 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ މިޑްފީލްޑަރު ކަސަމީރޯ އެވެ. ނަމަވެސް އޭގެ ހަތަރު މިނެޓު ފަހުން މެޗުގެ އިތުރު ވަގުތުގެ ތެރޭގައި އަނެއްކާ ވެސް ބަޔާން މިއުނިކް އިން އިތުރު ލަނޑެއް ކާމިޔާބުކުރި އެވެ. މިލަނޑު އެޓީމަށް ކާމިޔާބުކޮށްދިނީ ފްރާންސްގެ ފޯވާޑު މެތީސް ޓެލް އެވެ. މިއީ އެޓީމުގެ މިޑްފިލްޑަރު ކިމިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޔުނައިޓެޑުން މިމެޗުގައި ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގެ އެންމެ ފަހު މިނެޓްގައި ކާމިޔާބުކޮށްދިނީ ވެސް ކަސަމީރޯ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-3 ގެ ނަތީޖާއަކުން ބަޔާން މިއުނިކް ކުރީގައި އޮވެގެންނެވެ. އަދި މިގްރޫޕްގައި ރޭ ކުޅެވުނު ދެވަނަ މެޗުގައި ތުރުކީގެ ގަލަޓަސަރާއީ އާއި ޑެންމާކުގެ ކޯޕަންހޭގަން ވާދަކުރި މެޗު ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.